Եվրախորհրդարանի անդամները հոկտեմբերի 3-ի բանավեճի ժամանակ կոշտ քննադատության ենթարկեցին Ալիևի վարչակարգի գործողությունները Լեռնային Ղարաբաղի և Հայաստանի նկատմամբ։
Ինչպես հայտարարել է Հարավային Կովկասի հետ հարաբերությունների գծով Եվրախորհրդարանի պատվիրակության ղեկավար Մարինա Կալջուրանդը, Եվրամիությունը պետք է վերանայի իր հարաբերությունները Ադրբեջանի հետ և առաջ քաշի իր պայմանները։
«Մենք պետք է դադարեցնենք հանդարտեցման քաղաքականությունը, և Ալիևի վարչակարգի համար անհապաղ հետևանքներ պետք է լինեն»,- ընդգծել է նա։
Կալջուրանդը քննադատել է նաև Եվրահանձնաժողովի ղեկավար Ուրսուլա ֆոն դեր Լեյենին, ով անցյալ տարի իր այցի ժամանակ կանգնել էր Ադրբեջանի նախագահ Իլհամ Ալիևի կողքին և գովել Բաքվին՝ նրան անվանելով «ԵՄ վստահելի գործընկեր»։
«Այսօր Հանձնաժողովը շատ հստակ հասկացրեց, որ Ադրբեջանի գործողությունները՝ սկսած ռազմական գործողություններից, ավարտվում են Լեռնային Ղարաբաղի բնակչության բռնի տեղահանմամբ, ինչը փաստացի էթնիկ զտում է և անընդունելի»,- նշել է նա։
Եվրախորհրդարանի պատգամավորի խոսքով՝ ԵՄ-ն արձագանքելու համար անհրաժեշտ լծակներ ունի, և նրա պատասխանը պետք է ներառի պատժամիջոցներ։
Իր հերթին, եվրոպացի պատգամավոր Նատալի Լոզոն, անդրադառնալով Լեռնային Ղարաբաղի շուրջ ստեղծված իրավիճակին, կոչ է արել չկրկնել անցյալի սխալները։
«Մենք պետք է ծառայենք մեր պատվին և ծառայենք Հայաստանին»,- ընդգծեց նա։
ԵՄ-ում Հայաստանի դեսպան Տիգրան Բալայանը X-ի իր միկրոբլոգում մեկնաբանել է Լեռնային Ղարաբաղի վերաբերյալ Եվրախորհրդարանում տեղի ունեցած բանավեճը։
«Եվրախորհրդարանի անդամները միակարծիք են.
Լեռնային Ղարաբաղի էթնիկ զտումները դատապարտելու հարցում
Ալիևի ռեժիմը պետք է բախվի իր գործողությունների հետևանքներին.
Հայաստանին ԵՄ-ի բազմակողմանի աջակցության մեջ
Հայերը պետք է վերադառնան Լեռնային Ղարաբաղ՝ միջազգային երաշխիքների և ներկայության ներքո»,- նշել է նա։