Կլիմայի փոփոխությունն ուժգնացրել է տեղատարափ անձրևներն ու ջրհեղեղները, որոնք հարվածել են Հարավային Աֆրիկայի (ՀԱՀ) Արևմտյան Քափսկի նահանգին: Տարերային աղետը սկսվել է սովորականից ավելի ուժեղ գարնանային մակընթացություններից հետո, հաղորդում է Bloomberg-ը՝ վկայակոչելով Հարավային Աֆրիկայի եղանակային ծառայության (SAWS) տվյալները։
Աղետի հետևանքով Ստելենբոսում՝ երկրի խոշորագույն գինեգործական շրջաններից մեկում, տեղացել է 194 միլիմետր, իսկ Յոնկերշուկում՝ 134 միլիմետր՝ ավելի քան մեկուկես անգամ ավելի, քան 1976 թվականի սեպտեմբերի առավելագույնը՝ 85 միլիմետրը։ Արևմտյան Քափսկի վարչապետ Ալան Ուինդեն խոստովանել է, որ ջրհեղեղի մասշտաբները կարող են լինել ամենաավերիչը վերջին 100 տարվա ընթացքում։
Հորդառատ անձրևները փաստացի արգելափակել են չորս միլիոն բնակչություն ունեցող ափամերձ Քեյփթաուն քաղաքի հիմնական ուղիները և վնասել տեղական ցորենի բերքը, կամուրջները և արդյունաբերական ենթակառուցվածքները: Բացի այդ, ջուրը հեղեղել է էլեկտրահաղորդման գծերը և փակել 84 ճանապարհ։ Տեղական իշխանությունները զգուշացրել են քաղաքացիներին սպասվող անձրևների և ուժեղ ջրհեղեղների վտանգի մասին, սակայն նախազգուշական միջոցները չեն օգնել խուսափել լայնածավալ ավերածություններից և մոտ հազար տների բնակիչների շտապ տարհանումից:
Օգոստոսի վերջին ամերիկացի օդերեւութաբանները նախազգուշացրել էին Ատլանտյան օվկիանոսում ջրի մակերեսային շերտի անոմալ տաքացման հետեւանքով փոթորիկների ուժգնացման սպառնալիքի մասին։ ԱՄՆ փոթորիկների ազգային կենտրոնն այնուհետև մատնանշեց Մեքսիկական ծոցում այսպես կոչված արագ փոթորիկների ձևավորման աճող ռիսկերը, որոնց դեպքում քամու արագությունը մեկ օրվա ընթացքում ավելանում է ժամում առնվազն 56 կիլոմետրով:
![](https://azat.tv/wp-content/uploads/2022/09/azattvlogoblack.png)