Կառավարություն

ԱԻՆ փրկարար ծառայության տնօրենը ընդունել է ՄԱԿ-ի Պարենի համաշխարհային ծրագրի ներկայացուցչին

Հուլիսի 23-ին ԱԻՆ փրկարար ծառայության տնօրեն Արտակ Նահապետյանն ընդունեց Հայաստանում ՄԱԿ-ի Պարենի համաշխարհային ծրագրի (ՊՀԾ) ներկայացուցիչ և տնօրեն Ելենա Միլոշևիչին:

Հանդիպման նպատակն էր քննարկել երկկողմ համագործակցության հետ կապված հարցերը:

Ողջունելով ՀՀ-ում միջազգային կառույցի ներկայացուցչին՝ Արտակ Նահապետյանն ընդգծեց արտակարգ իրավիճակներում ՊՀԾ դերը՝ որպես աղետներին առաջինն արձագանքող միջազգային կառույց:

Իր հերթին Ելենա Միլոշևիչը նշեց, որ ՊՀԾ-ի համար չափազանց կարևոր է նախանշել այն բոլոր ուղղությունները, որտեղ ծրագիրը կարող է աջակցել ՀՀ պատկան մարմիններին առավել պատրաստված լինել հնարավոր աղետների պարագայում:

Ելենա Միլոշևիչը, մասնավորապես, մատնանշեց պարենային ապահովվածության, պահեստների ստեղծման և լոգիստիկայի հարցերում երկկողմ փոխգործակցության հնարավորությունները: Նրա խոսքով, Հայաստանի նման՝ փակ սահմաններ ունեցող և դեպի ծով ելք չունեցող երկրում չափազանց կարևոր է ժամ առաջ պատրաստ լինել բնակչությանը պարենով ապահովելուն:

Ելենա Միլոշևիչը որպես օրինակ մատնանշեց պարենի ռոտացիոն պահեստներ ստեղծելու ՊՀԾ փորձը, դեպքերի զարգացման երկու սցենարների պարագայում: Ըստ առաջին սցենարի, շուկայում վերոնշյալ պարենը մշտապես առկա է բավարար մակարդակով և, հակառակը, առկա է որոշակի պաշարներ ստեղծելու անհրաժեշտություն:

Ելենա Միլոշևիչը շեշտեց, որ ելնելով Հայաստանի աշխարհագրական դիրքից, մեր երկրի պարագայում առավելապես նպատակահարմար է պարենի պահեստների ստեղծումը:

Արտակ Նահապետյանը կարևորեց աղետների պարագայում միջազգային կառույցի կողմից սկզբնական շրջանում (առաջին 7 օրերի ընթացքում) ՀՀ բնակչությունը տրամադրվելիք նյութական օգնության հնարավորությունների առարկայական վերհանումն ու հստակեցումը:

Սա, ըստ ՓԾ տնօրենի, չափազանց կարևոր է երկու հիմնական պատճառներով: Նախևառաջ, առաջին օգնությունը չափազանց կարևոր է հնարավորինս շատ մարդկանց կյանքեր փրկելու և մարդկանց դրությունը բարելավելու համար:

«Առաջին օրերին, անգամ ժամերին մարդկանց տրամադրված մեկ կտոր հացը անհամեմատելի ավելի կարևոր է, քան թե աղետից տևական ժամանակ հետո տրամադրված լայնածավալ օգնությունը»,- շեշտեց Արտակ Նահապետյանը:

Այս գործում, ըստ Արտակ Նահապետյանի, ՊՀԾ-ն, որպես աղետին առաջինն արձագանքող կառույց, ունի կարևորագույն առաքելություն:

Մյուս կողմից, ըստ ՓԾ տնօրենի, նյութական առաջին օգնությունը շատ կարևոր է նաև արդեն իսկ արձանագրված սահմանների փակման հնարավորության պարագայում: Այս առումով՝ Արտակ Նահապետյանը բերեց դիզելային վառելիքի տրամադրման կտրոնների օրինակը, որոնք կորցնում են իրենց իմաստը, երբ երկրում վառելիք պարզապես չկա:

Ելենա Միլոշևիչը, համակարծիք լինելով ՓԾ տնօրենի առաջ բերած դիտարկումների հետ, պատրաստակամություն հայտնեց սերտացնել և գործնական հողի վրա դնել երկկողմ համագործակցությունը:

Քննարկվեց նաև ուսումնական հաստատություններում սննդի արագ պատրաստման և բաշխման կետերի ստեղծման հարցը, որոնք աղետի ժամանակ կծառայեն որպես արձագանքող ուժերի (փրկարարական և անհետաձգելի աշխատանքներ իրականացնող ուժերի) համար սննդի ապահովման կետեր:

Միջազգային կառույցի ներկայացուցիչը խնդրեց տրամադրել այն ուսումնական հաստատությունների ցանկը, որտեղ նախատեսվում է ստեղծել վերոնշյալ կետերը:

Հանդիպման վերջում Արտակ Նահապետյանը Պարենի համաշխարհային ծրագրի ներկայացուցիչներին հրավիրեց մասնակցել սեպտեմբերին Շիրակի մարզի Բավրա անցակետում նախատեսված միգրացիոն հոսքերի կառավարմանը նվիրված համատեղ ուսումնավարժությանը, որն անց է կացվելու ՄԱԿ-ի մեկ այլ կառույցի՝ փախստականների հարցերով գերագույն հանձնակատարի հայաստանյան գրասենյակի հետ համատեղ:

Այս մասին տեղեկացնում են ՀՀ ԱԻՆ պաշտոնական կայքից։

ՎԵՐՋԻՆ ԼՈւՐԵՐ

ՎԵՐԵՎ