ՀՀ ԱԺ տնտեսական հարցերի մշտական հանձնաժողովը Բաբկեն Թունյանի նախագահությամբ մայիսի 22-ին հրավիրված նիստում քննության է առել տնտեսության, վիճակախաղերի և հարկային ոլորտներին առնչվող մի շարք օրենսդրական նախաձեռնություններ:
Երկրորդ ընթերցմամբ քննարկվել է կառավարության հեղինակած «Պետական տուրքի մասին» ՀՀ օրենքում լրացում կատարելու մասին», «Գործունեության իրականացման ծանուցման մասին» ՀՀ օրենքում լրացում կատարելու մասին» նախագծերի փաթեթը:
ՀՀ տնտեսական զարգացման և ներդրումների նախարար Տիգրան Խաչատրյանը նշել է, որ առաջին ընթերցումամբ ընդունված օրենքի նախագծով հաստատված մեկ տոննա ցեմենտի համար 22 հազար դրամ պետական տուրքը գործադիրն առաջարկում է սահմանել 14 հազար դրամ:
Ըստ նախարարի՝ նպատակն է պահպանել ցեմենտ արտադրող ձեռնարկություններում գործող աշխատատեղերը և նպաստել շուկայում մրցակցային պայմանների բարելավմանը: Ցեմենտի կլինկերի որևէ տուրք չի սահմանվելու: Օրենքը կգործի մինչև եկող տարվա ապրիլի 1-ը: Ժամկետի սահմանումը պայմանավորված է շուկայի ամբողջական ուսումնասիրությամբ ու խնդիրների վերհանումով:
Հնչել են տարատեսակ կարծիքներ՝ «Լուսավոր Հայաստան» և «Բարգավաճ Հայաստան» խմբակցությունների ներկայացուցիչները դեմ են արտահայտվել օրենսդրական փաթեթին: Նշվել է, որ անհրաժեշտ է օրենսդրորեն սատարել տեղի արտադրողներին:
Քննարկման արդյունքում օրենսդրական նախաձեռնությունն ստացել է դրական եզրակացություն՝ առաջիկա հերթական նիստերի օրակարգի նախագծում ընդգրկվելու համար:
«Լուսավոր Հայաստան» խմբակցության հեղինակած «ՀՀ քաղաքացիական օրենսգրքում փոփոխություն կատարելու մասին» օրենքի նախագծով առաջարկվում է օրենսգրքի 96-րդ հոդվածի 2-րդ մասն ուժը կորցրած ճանաչել:
Ըստ հիմնական զեկուցող Մանե Թանդիլյանի՝ սահմանափակ պատասխանատվությամբ ընկերության հիմնադրման համար կա պահանջ, որի համաձայն ընկերությունը չի կարող որպես միակ մասնակից ունենալ մեկ անձից կազմված այլ տնտեսական ընկերություն: Առաջանում է արհեստական խոչընդոտ, մասնավորապես, երբ օտարերկրյա ընկերությունները Հայաստանում ընկերություն գրանցելու համար ստիպված են լինում ներգրավել երկրորդ սեփականատեր:
Պատգամավորը նշել է, որ նախագծի նպատակն է բարձրացնել տնտեսական գործունեության պետական կարգավորման արդյունավետությունը, վերացնել գործարար միջավայրի և շուկայական տնտեսության զարգացմանը խոչընդոտող դրույթները, բարելավել պետության կողմից տնտեսվարողներին մատուցվող ծառայությունները:
Կառավարությունը նախագծին տվել է դրական եզրակացություն: Այն առաջարկվել է դրական եզրակացությամբ ընդգրկել նստաշրջանի օրակարգի նախագծում:
Պատգամավորներ Ալեն Սիմոնյանի, Սիփան Փաշինյանի, Նաիրա Զոհրաբյանի հեղինակած «Վիճակախաղերի մասին» և «Շահումով խաղերի, ինտերնետ շահումով խաղերի և խաղատների մասին» ՀՀ օրենքներում փոփոխություններ կատարելու մասին» օրենքների նախագծերով փորձ է արվում սահմանել, որ անմիջականորեն (խաղասրահի միջոցով) տոտալիզատոր և ավտոմատացված սարքավորումների միջոցով վիճակախաղ կարող է կազմակերպվել միայն Կոտայքի մարզի Ծաղկաձոր, Գեղարքունիքի մարզի Սևան, Վայոց Ձորի մարզի Ջերմուկ, Սյունիքի մարզի Մեղրի համայնքների վարչական սահմաններում:
Ներկայում նման վիճակախաղի կազմակերպումն իրականացվում է երկրի ողջ տարածքում. դրանց գերակշիռ մասը տեղակայված է մարդաշատ բնակավայրերում: Այս փաստը բացասական ազդեցություն է թողնում հասարակության վրա` վիճակախաղերով հրապուրվելու վտանգ ստեղծելով:
ՀՀ ԱԺ նախագահի տեղակալ Ալեն Սիմոնյանը կարևորելով օրենսդրական նախաձեռնության ընդունումը՝ նշել է, որ այն կնպաստի ոլորտում առկա խնդիրների լուծմանն, ինչպես նաև խաղամոլության դեմ պայքարին:
Նախագծերը նպատակ են հետապնդում սահմանափակել քաղաքացիների՝ վիճակախաղերով տարվելու անմիջական հնարավորությունը: Սահմանվում է նաև այն կառուցակարգը, որը հնարավորություն է ընձեռելու մոլեխաղերով հրապուրվելու հետևանքով իրեն և իր ընտանիքին նյութական ծանր վիճակի հասցրած անձի՝ հետագայում նման գործողություններ կատարելու հնարավորությունն օրինական կարգով սահմանափակել:
ԱԺ տնտեսական հարցերի մշտական հանձնաժողովի նախագահ Բաբկեն Թունյանը ներկայացրել է գործընկերների առաջարկները: Ըստ այդմ՝ մայրաքաղաքի վարչական շրջաններում նախատեսվում է թույլատրել գործունեություն ծավալել մեկական, մարզկենտրոններում` երկուական կետերի:
Ալեն Սիմոնյանն առաջարկել է Երևանում առաջնորդվել, այսպես ասած, ընտրատարածքային սկզբունքով: Մեծ վարչական շրջաններում թույլատրել երկուական, փոքրերում՝ մեկական կետերի գործունեություն: ԱԺ նախագահի տեղակալը դեմ է արտահայտվել օրենքի ուժի մեջ մտնելը մեկ տարի ժամկետով հետաձգելուն:
Կառավարության եզրակացությունը դրական էր:
Այս հարցի և օրակարգում ընդգրկված մյուս նախագծերի քննարկումը կշարունակվի մայիսի 23-ին:
ՀՀ ԱԺ պատգամավոր Միքայել Մելքումյանի հեղինակած «ՀՀ հարկային օրենսգրքում փոփոխություններ և լրացումներ կատարելու մասին» օրենքի նախագծի քննարկումը հետաձգվել է մինչև երկու ամսով:
ԽՈՐՀՈւՐԴ Է ՏՐՎՈւՄ ԿԱՐԴԱԼ
