Սփյուռքի գործերի գլխավոր հանձնակատարի գրասենյակն աշխատում է «Հայաստան 2050» տեսլականի ուղղությամբ: Ակնկալում ենք մինչև 2050-ը ունենալ առնվազն 5 մլն բնակչություն: Այս մասին 2020 թվականի պետական բյուջեի նախագծի քննարկմանն ասաց Սփյուռքի գործերի գլխավոր հանձնակատար Զարեհ Սինանյանը` պատասխանելով ԱԺ տնտեսական հարցերի մշտական հանձնաժողովի նախագահ Բաբկեն Թունյանի հարցին:
Բաբկեն Թունյանը հետաքրքրվել էր, թե ինչ թիրախներ է նախանշել գրասենյակը հայրենադարձության, մասնագետների ներգրավման համար:
«Մենք կոնկրետ հիմա աշխատում ենք «Հայաստան 2050» տեսլականի վրա: Մեր ակնկալիքն է, որ մինչև 2050 թվականը Հայաստանն ունենա մինիմում 5 մլն բնակչություն»,-պատասխանել է Սինանյանը:
Հանձնակատարը նշել է, որ եթե վստահ լինի այն հարցում, որ Հայաստանի կառավարությունը կարող է արժանապատիվ աշխատավարձ վճարել աշխարհի լավագույն համալսարաններ ավարտած սփյուռքում ապրող հայ մասնագետներին, ապա ինքը 1 ամսում կարող է այդ անձանց հրավիրել Սփյուռքից: