ԱՄՆ-ի պետական բյուջեի պակասուրդը փետրվարին կազմել է 233,977 միլիարդ դոլար, ինչը 8,7 տոկոսով ավելի է նախորդ տարվա նույն ամսվա ցուցանիշից (215,239 մլրդ դոլար): Այս մասին հայտնել է երկրի ֆինանսների նախարարությունը:
Դա բացասական հաշվեմնացորդի ռեկորդային ցուցանիշ է հաշվարկների վարման ժամանակաշրջանում: Նախորդ առավելագույնն արձանագրվել է 2012 թվականի փետրվարին և կազմել 231,7 միլիարդ դոլար, նշում է MarketWatch-ը: Միևնույն ժամանակ 2019 ֆինանսական տարվա, որն սկսվել է հոկտեմբերի 1-ին, հինգ ամսում ԱՄՆ-ի բյուջեի բացասական հաշվեմնացորդն ավելացել է 39,2 տոկոսով և հասել 544,229 միլիարդ դոլարի՝ մեկ տարի առաջվա զուգադրելի շրջանի 310,252 միլարդ դոլարի համեմատությամբ:
Կոնգրեսի Բյուջետային վարչությունն (CBO) այս ֆինանսական տարում կանխատեսում է բյուջեի պակասուրդի ավելացում մինչև 897 միլիարդ դոլար կամ համախառն ներքին արդյունքի 4,2 տոկոսը, հաղորդել է «Ինտերֆաքսը»:
