Իրանի հարցերով ԱՄՆ հատուկ ներկայացուցիչ, Պետդեպարտամենտի բարձրաստիճան պաշտոնյա Բրայան Հուքը հայտարարել է, որ նոյեմբերին Իրանում տեղի ունեցած բողոքի զանգվածային ակցիաների ընթացքում իշխանություններն առնվազն հազար ցուցարար են սպանել:
Ինչպես գրում է Politico-ն, նա հավելել է, որ վիրավորների թիվը հասնում է մի քանի հազարի, մինչդեռ ստեղծված քաոսային իրավիճակում ձերբակալվածները մոտ 7000-ն են:
Լրագրողների հետ շփման ընթացքում Հուքն ասել է, որ ամերիկյան կողմը զոհերի թվի վերաբերյալ հստակ տեղեկություն ունի:
Հիշեցնենք, որ Իրանում զանգվածային ակցիաները սկսվել են, երբ իշխանությունները հայտարարել են բենզինի գինը եռակի թանկացնելու մասին: Դժգոհ իրանցիները դուրս են եկել երկրի ավելի քան հարյուր քաղաքների փողոցներ, որտեղ իրավապահների հետ բախումներ են եղել:
Հուքը նշել է, որ իրանական ռեժիմը չափազանց կոշտ պատասխան է տվել և միտումնավոր արգելափակել է համացանցի հասանելիությունը, որպեսզի երկրից տեղեկատվության արտահոսք չլինի:
Հավելենք, որ Իրանի իշխանությունները զոհերի վերաբերյալ պաշտոնական թվեր չեն ներկայացրել:
ԽՈՐՀՈւՐԴ Է ՏՐՎՈւՄ ԿԱՐԴԱԼ
