Apple-ը շարունակել է աշխատել ինքնակառավարվող մեքենայի վրա և կարող է այն թողարկել առաջիկա տարիներին: Այս մասին հայտնում է CNBC-ն՝ հղում անելով Wedbush-ի վերլուծաբան Դենիել Այվսին։
Ըստ ինսայդերի՝ չնայած այն բանին, որ կորպորացիայի ներկայացուցիչները չեն մեկնաբանում մեքենայի հետ կապված իրավիճակը, Apple Car նախագծի վրա աշխատանքները դեռ շարունակվում են։ Այվսը նշել է բրենդի առաջին մեքենայի անոնսի մոտավոր ամսաթիվը՝ նրա կարծիքով, նախագծի մասին կհայտարարվի 2026 թվականից ոչ շուտ։
Դենիել Այվսն ընդգծել է, որ չնայած դժվարություններին, Apple-ը չի նախատեսում սառեցնել նախագիծը։ Մասնագետը նշել է, որ ամերիկյան ՏՏ հսկայից անօդաչու մեքենայի թողարկման հարցը «երբ, ոչ թե եթե» է։
Վերլուծաբանը հիշեցրել է, որ 2021 թվականին Թիմ Քուկի ընկերությունը շփվել է մի քանի ավտոարտադրողների հետ՝ օգնելու նրան մտնել իր համար նոր շուկա՝ ընկերությունը կապի մեջ է եղել Hyundai-ի, Nissan-ի և այլ կոնցեռնների հետ: Այվսն այս կապերն անվանել է «ծանոթությունների խաղ»։ Եզրափակելով՝ ինսայդերը նշել է, որ, ըստ որոշ լուրերի, Apple-ը նախագծի վրա սկսել է աշխատել դեռևս 2014 թվականին, այսինքն՝ կորպորացիան իր առաջին անօդաչու մեքենան մշակում է արդեն գրեթե 10 տարի։
Մայիսին հայտնի դարձավ, որ ԱՄՆ արդարադատության նախարարությունը մեղադրանք է ներկայացրել Apple-ի նախկին աշխատակից Վանգ Վեյբաոյի դեմ։ Ինչպես հայտնում է CNBC-ն, նա գողացել է Apple-ի մեքենայի սկզբնական կոդը, այնուհետև տեղափոխվել Չինաստան, որտեղ ղեկավարել է Baidu և Geely ինքնակառավարվող մեքենաների մշակումը։
