Ի՞նչ խնդիրներ կարող է առաջ քաշել թիմերի քանակի ավելացումը, ո՞ւմ կողմից են ֆինանսավորվում դրանք և արդյոք որևէ մեկը դիմե՞լ է ֆեդերացիային Առաջին խմբում դրանց գործունեությանը վերաբերող բողոքով ArmSport.am-ը փորձել է պարզել ՀՖՖ առաջին փոխնախագահ, գլխավոր քարտուղար Արմեն Մելիքբեկյանի հետ զրույցում:

-Առաջին խմբի առաջնությանն այս մրցաշրջանում կմասնակցի 18 թիմ, որից 10 նոր կազմավորված ակումբներ են: Ինչո՞վ է պայմանավորված թիմերի այս հոսքը:

-Պայմանավորված է նրանով, որ մենք շատ ակտիվ ենք աշխատել այդ ուղղությամբ: Ոչ բոլոր ակումբների հետ, բայց կան ակումբներ, որոնց հետ նախապես ենք հանդիպել, խոսել ենք և՛ սեփականատերերի, և՛ ղեկավարների հետ. մասնավորապես, «Վան» ակումբը, «Դիլիջանի» հիմնադիր անգլիացի երիտասարդին ենք հանդիպել: Ես հանդիպումներ եմ ունեցել նաև մի շարք այլ ակումբների հետ: Մենք ԲԿՄԱ-ն ենք ստեղծել: Այս ամենը բերեց նրան, որ ունեցանք այս քանակի ակումբներ, բայց նաև չունենք իլյուզիաներ, սթափ ենք գնահատում իրավիճակը, գիտենք, որ այս ակումբներից ոչ բոլորը կկայանան: Տեսնենք՝ ընթացքում ինչ կլինի, և ինչպիսին կլինեն մեր անելիքները:

-Ինչպիսի՞ն է նոր ակումբին առաջնությանը մասնակցելու թույլտվություն տալու գործընթացը:

-Կա ընթացակարգ: Մրցումների անցկացման բաժին ունենք, որտեղ իրենց բացատրում են բոլոր ընթացակարգերը, բայց ես անձամբ, ցանկության ու հնարավորության դեպքում, հանդիպել եմ նրանց հետ, ովքեր ցանկացել են խոսել ավելի մեծ ներդրումների մասին, ավելի լուրջ նպատակներ են ունեցել: Հանդիպել եմ նաև այն ակումբների հետ, որոնք ցանկացել են միանալ առաջնությանը, բայց հետո ֆինանսական խնդիրների պատճառով որոշել են դեռևս չանել դա, օրինակ՝ «Դովեղ» ակումբը: Մի խոսքով, դա գործընթաց է, որով զբաղվել են և մեր համապատասխան դեպարտամենտը, և, երբեմն էլ, ես եմ միացել այդ գործընթացին:

-Այսինքն, ակումբ հիմնելիս ֆեդերացիայի համար ի՞նչ գործոններ են կարևոր:

-Ֆեդերացիան ունի կարգ. յուրաքանչյուր թիմ կարող է գալ և մասնակցել առաջնությանը, եթե ունի դաշտ, հայտավորված ֆուտբոլիստներ և այլն: Ֆեդերացիան չի կարող արգելել, եթե թիմը բոլոր կարգերին համապապատասխանում է: Արդյոք մեր Առաջին խմբի բոլոր թիմերը կարողանո՞ւմ են ամեն ինչ անել մինչև առաջնությունը, կտեսնենք: Իսկ հետագայում արդեն ֆեդերացիան կարող է հետևել նրանց գործունեությանը, որպեսզի ամեն ինչ լինի կանոնակարգված:

-Իսկ արդյոք ՀՖՖ-ի համար կարևո՞ր է՝ ինչպես և ում կողմից են ֆինանսավորվում մեր առաջնություններին մասնակցող ակումբները:

-Երբ ակումբները հանձնում են իրենց հավաստագրերը, այնտեղ գրված է՝ նախագահն ով է, և մենք պատկերացում ունենում ենք նրա մասին: Ինչ վերաբերում է ֆինանսական աղբյուրներին, ապա ինձ հանդիպած մարդկանցից փորձել եմ տեղեկանալ, բայց ամեն ինչ շատ ավելի հստակ կլինի առաջնության մեկնարկից հետո:

-Հետևաբար, սկզբնական շրջանում կարևոր չէ՞, թե ակումբներն ում կողմից են ֆինանսավորվում:

-Ֆեդերացիայի համար կարևոր է՝ ակումբներն ում կողմից են ֆինանսավորվում, ինչպիսի ներդրումներ են արվելու, որովհետև, օրինակ, կա Չարենցավանի խաղադաշտ, որը կառուցել է ֆեդերացիան ու տվել է համայնքին, պայման կար, որպեսզի այնտեղ վերանորոգեին տրիբունաները, հանդերձարանները, որ այնտեղ սկսեին խաղալ: Մենք հանդիպել ենք, ստացել ենք հավաստիացում, որ դա կարվի, և աշխատանքները հիմա ընթանում են: Գիտենք՝ ով է սեփականատերը և ինչ ներդրումներ է անում: Նույնը՝ «Արագածը»: «Քասախի մարզիկ» մարզադաշտում պետք է համապատասխան ներդրումներ արվեն, վերանորոգվեն հանդերձարանները, որպեսզի թույլ տանք նրանց խաղալ: Այդ առումով, բնականաբար, կարևոր է ամեն ինչ:

-Այս ամենից կարելի՞ է ենթադրել, որ ֆեդերացիան գիտի, թե Առաջին խմբի բոլոր 18 ակումբները որտեղից են ֆինանսավորվում:

-Մենք գիտենք բոլորի նախագահներին և հիմնականում տիրապետում ենք այդ տեղեկատվությանը, այո:

-Պարո՛ն Մելիքբեկյան, առաջնության՝ մրցունակ դառնալու առումով ակումբների այս թիվը, գուցե, լավ է, բայց կարո՞ղ են այս ամենի տակ նաև հայկական ֆուտբոլին սպառնացող վտանգներ լինել:

-Այո՛, որոշակի խնդիրներ անպայման կծագեն, մենք այդ վտանգները տեսնում ենք, բայց նաև վստահ ենք, որ ֆուտբոլի ֆեդերացիայի համար դրանք կառավարելի են:

-Կմանրանամասնե՞ք՝ ինչ վտանգներ եք տեսնում:

-Այն, որ համալրումները խնդիր են լինելու թիմերի համար: Մենք դեռևս չունենք այն քանակությամբ ֆուտբոլիստներ, որոնք կարող են համալրել 18 թիմերը, կամ որակով համալրումներ լինեն: Բացատրեմ՝ խնդիրն ինչումն է: Դուք գիտեք, որ Առաջին խմբում պետք է Հայաստանի քաղաքացիություն ունեցող առնվազն 10 ֆուտբոլիստ լինի: Դա նշանակում է, որ նվազագույնը 180 ֆուտբոլիստ պետք է ներկայացված լինի այդ 18 թիմում: Այդ առումով, իհարկե, որակի որոշակի անկում կլինի…Դա հիմնական ռիսկերից է: Երկրորդ ռիսկն այն է, որ, գուցե, ոչ բոլոր ակումբները կկարողանան տանել այդ ֆինանսական բեռը: Նախկինում ակումբներն ավելի քիչ էին ճանապարհորդում, իսկ հիմա ճանապարհների ծախսերն ավելի են մեծանում: Թիմեր կան Չարենցավանում, Դիլիջանում…ծախսերը մեծանալու են: Բայց կրկնում եմ, որ մենք պատրաստ ենք դիմակայել ռիսկերին և հընթացս օգնել ակումբներին, եթե նման ցանկություն կա ու նպատակ կա կայանալու:

-Ձեր խոսքում շեշտեցիք նաև նորաստեղծ «Արագած» ակումբի անունը, որտեղից վերջերս հեռացված գլխավոր մարզիչ Վարազդատ Ավետիսյանը մեզ հետ զրույցում կոչ էր արել ֆուտբոլային հանրությանը պայքարել, մասնավորապես, Առաջին խմբում կատարվող մութ գործերի դեմ: Որևէ մեկը դիմե՞լ է ֆեդերացիա այսպիսի խնդրով, ստացե՞լ եք բողոքներ:

-Մենք բողոք չենք ստացել: Վստահեցնում եմ և՛ Վարազդատ Ավետիսյանին, և՛ ամբողջ հանրությանը, որ ֆուտբոլի ֆեդերացիան շատ ուշադիր է հետևում ընթացող գործընթացներին և կրկնում եմ, որ մենք ունակ ենք բացառել նշված բոլոր տեսակի մութ գործերը: Վստահ եմ, որ այդ բոլոր ռիսկերը մեզ համար այս պահին կառավարելի են:

-Իսկ այսպիսի հարցազրույց-կոչերը կարո՞ղ են հիմք հանդիսանալ ֆեդերացիայի համար դրանց պատճառները բացահայտելու ուղղությամբ միջոցներ ձեռք առնելու համար:

-Մենք խոսել ենք պարոն Ավետիսյանի հետ: Նա հիմա ԲԿՄԱ թիմի մարզիչն է, գլխավոր մարզիչ Ռաֆայել Նազարյանի օգնականն է: Մենք տիրապետում ենք իրավիճակին բոլոր առումներով, որ առումով էլ ասեք: Եթե խնդիրներ լինեն, մենք, իհարկե, համարժեք քայլեր կանենք:

Առաջին խմբում որակի որոշակի անկում կլինի․ Արմեն Մելիքբեկյան

Ամենադիտվածներ

Նմանատիպ հոդվածներ

Ամենաթարմ