ԿԳՄՍ նախարարի տեղակալ Արթուր Մարտիրոսյանը մասնակցել է «Դասավանդի՛ր, Հայաստան» կազմակերպության «ՖՈՐՈՒՄ405» կրթական համաժողովին:
ԿԳՄՍ նախարարի տեղակալ Արթուր Մարտիրոսյանը ողջունել է ներկաներին և կարևորել «Դասավանդի՛ր, Հայաստանի» գործունեությունը՝ կրթական համակարգի խնդիրների վերհանման ու հնարավոր լուծումների նախանշման տեսանկյունից:
Անդրադառնալով կրթական համակարգում փոփոխություններ կատարելու, միաժամանակ ավանդույթները պահպանելու վերաբերյալ հարցին՝ Արթուր Մարտիրոսյանն ասել է. «Մենք ունենք մշակույթի վերարտադրության, պատմական կրթական ավանդույթներ և այդ առումով առանձնանում ենք աշխարհի երկրների հանրույթում: Մյուս կողմից՝ ժամանակակից կրթական համակարգը, որը Խորհրդային Միության ժամանակ է զարգացել, մասամբ ուղղորդված էր, մասամբ՝ մեր ստեղծածը, և այսօր կարիք ունի բարեփոխվելու: Հայաստանի անկախ հանրապետությունը կրթական համակարգի կարևոր խնդիրն է ձևավորել այն քաղաքացուն, որը պատրաստ է տեր կանգնել պետականությանը, զարգացնել և ուժեղացնելու այն»:
Ըստ փոխնախարարի՝ գերատեսչության թիվ մեկ խնդիրներից մեկը լավ տվյալներ ունենալն է, որը բերում է համակարգի կառավարելիության, հաշվետվողականության բարձրացմանը, և իհարկե, տեղեկացված որոշումների ընդունմանը: Մարտիրոսյանը շեշտել է՝ մենք գտնվում ենք ակտիվ բարեփոխումների փուլում, որտեղ կարևոր է ունենալ համադրելի տվյալներ:
Արթուր Մարտիրոսյանը բարձր է գնահատել Համաշխարհային բանկի՝ որպես զարգացման գործընկերոջ դերը ոչ միայն ֆինանսական, այլև փորձագիտական աջակցության առումով:
Համաժողովի շրջանակում քննարկվել են հասարակական կազմակերպությունների դերին ու առաքելությանը, դրանց արդյունավետության բարձրացմանը, նպատակային գործունեությանը վերաբերող հարցեր: «Ժողովրդավարական երկրներում որոշումները կայացվում են երկխոսությունների միջոցով՝ նաև ներգրավելով քաղաքացիական հասարակությանը: Հետևաբար բոլոր ոչ պետական կառույցների դերը որոշումների կայացման գործընթացում տարբեր հանրությունների ձայնի լսելիության ապահովումն է»,- ասել է Ա. Մարտիրոսյանը՝ փաստելով, որ հատկապես համավարակի օրերին բազմաթիվ ՀԿ-ներ արձագանքել են նախարարության կոչին՝ աջակցելու աշակերտների կրթության շարունակականության ապահովմանը :
Ըստ փոխնախարարի` ՀԿ-ների առաքելության հաջորդը կարևոր դերը նորարարություն բերելն է՝ ստեղծելու հայկական կրթական արտադրանք, կառավարման մոդելի դրական փորձառություն, որը քննարկումների, արդյունքների վերլուծմամբ կարելի է ներմուծել ընդհանուր կրթական համակարգ:
«Մենք դարեր շարունակ փորձությունների միջով ենք անցել և դեռ շարունակում ենք դիմակայել մարտահրավերներին, որոնք մեզնից պահանջում են առավելագույն համախմբում, միասնական ճիգի գործադրում, ինչը կարող է լինել արդյունավետ միայն այն սերնդի հետ, որը պատրաստ է մտնել այդ մարտահրավերների դաշտ և լուծել խնդիրները: Զարգացած պետություն ունենալու համար պետք է ունենալ առաջադեմ, կրթված, պատրաստված, նախաձեռնող, հմտություններ, արժեքներ ունեցող սերունդ: Միայն այս պարագայում կտեսնենք հայկական վերածնունդը»,- խոսքն ամփոփել է ԿԳՄՍ նախարարի տեղակալ Արթուր Մարտիրոսյանը:
Ֆորումը եզրափակվել է մեր օրերի կրթության ջատագովների՝ ոլորտի ներկայացուցիչների՝ իրենց հաջողության պատմությունների, անցած ճանապարհի, փորձառության մասին պատմություններով:
ԽՈՐՀՈւՐԴ Է ՏՐՎՈւՄ ԿԱՐԴԱԼ
