Առաջիկայում Արարատի մարզի լոլիկի մեծածավալ արտադրությամբ զբաղվող Ոսկետափ համայնքում կիրականացվի ցեց վնասատուի դեմ պայքարի միջոցառումների պիլոտային ծրագիր:
Համապատասխան որոշումն արդեն ընդունվել է կառավարության կողմից:
Ծրագիրն իրականացվում է «Հայաստանի ազգային ագրարային համալսարան» հիմնադրամի միջոցով: Ծրագրի իրականացման նպատակով 11,102.88 հազ. ՀՀ դրամ, առաջին կիսամյակում 4639 (Այլ ընթացիկ դրամաշնորհներ) տնտեսագիտական դասակարգման հոդվածով դրամաշնորհային պայմանագրով կհատկացվի «Հայաստանի ազգային ագրարային համալսարան» հիմնադրամին:
Ծրագրի նպատակն է.
1) Հայաստանի Հանրապետության Արարատի մարզի լոլիկի մեծածավալ արտադրությամբ զբաղվող Ոսկետափ համայնքում, 10 հեկտար տարածքի վրա, իրականացնել ցեցի դեմ պայքարի համալիր (ագրոտեխնիկական, մեխանիկական, կենսաբանական և քիմիական) միջոցառումների կիրառման նոր առաջարկների փորձարկման և դրանց արդյունավետության գնահատումը.
2) ցեցի դեմ պայքարի միջոցառումների կատարման ժամկետների որոշումը և այդ մասին հողօգտագործողներին օպերատիվ տեղեկատվության ապահովումը, առավել արդյունավետ պեստիցիդների տեսակների ու օգտագործման չափաքանակների վերաբերյալ խորհրդատվություն տրամադրումը.
3) ցեցի կենսակերպի, տարածվածության և վնասակարության վերաբերյալ հողօգտագործողների իրազեկվածության բարձրացումը:
Ծրագրի իրականացման և փորձադաշտը տնօրինող հողօգտագործողի կողմից ագրոտեխնիկական համալիր միջոցառումների կատարման արդյունքում ակնկալվում է ցեցի հասցված վնասից փորձադաշտում բերքի կորուստների կանխում առնվազն 70 %-ով:
Այս մասին տեղեկանում ենք Արարատի մարզպետարանի պաշտոնական կայքից։