Բարսելոնայում ընթացող «Համաշխարհային բջջային կոնգրեսի» (MWC) շրջանակներում ՀՀ բարձր տեխնոլոգիական արդյունաբերության նախարարի տեղակալ Ռուբեն Սիմոնյանը հանդիպում է ունեցել «Մայքրոսոֆթ» ընկերության հանրային հատվածի կորպորատիվ փոխնախագահ Ֆիլիպ Ռոժեի հետ։ Հանդիպման ընթացքում քննարկվել են Հայաստանի թվային փոխակերպման ռազմավարական տեսլականը, տվյալների վրա հիմնված տնտեսության ձևավորումը և բարձր տեխնոլոգիական էկոհամակարգի հզորացումը։ Ռուբեն Սիմոնյանը ընդգծել է միջազգային տեխնոլոգիական առաջատարների հետ համագործակցության կարևորությունը՝ որպես նորարարական ներուժի իրացման և պետական համակարգում ժամանակակից լուծումների ներդրման արդյունավետ գործիք։
Կողմերը անդրադարձել են առկա փոխգործակցության դինամիկային և քննարկել համագործակցության խորացման հնարավորությունները, մասնավորապես արհեստական բանականության և ամպային տեխնոլոգիաների կիրառման ոլորտներում։ Հատուկ ուշադրություն է դարձվել գիտելիքի և փորձի փոխանակմանը, ինչպես նաև կրթության և շարունակական ուսուցման դերին՝ որպես նորարարության, տնտեսական աճի և կայուն զարգացման առանցքային խթանիչներ։
Հանդիպման ավարտին կողմերը պայմանավորվել են շարունակել քննարկումները և ուսումնասիրել համագործակցության ամրապնդման կոնկրետ ձևաչափերն ու առաջնահերթ ուղղությունները՝ նպատակ ունենալով ապահովել Հայաստանի տեխնոլոգիական առաջընթացը և մարդկային կապիտալի զարգացումը։ Այս համագործակցությունը կարող է նոր հարթակ ստեղծել Հայաստանի թվային էկոհամակարգի զարգացման համար՝ համաշխարհային տեխնոլոգիական առաջատարների հետ համատեղ ծրագրերի միջոցով։