Ուզբեկստանի մայրաքաղաք Տաշքենդում անցկացվող Տրանսկասպյան տրանսպորտային միջանցքի և կապի ներդրողների համաժողովի շրջանակներում ՀՀ ՏԿԵ նախարար Դավիթ Խուդաթյանը մասնակցել է ԵՄ, Կենտրոնական Ասիայի, Կովկասի և Սևծովյան տարածաշրջանի երկրների տրանսպորտի նախարարների նիստին։ Իր ելույթում նախարարը շեշտել է տրանսպորտի կարևորությունը սոցիալ-տնտեսական կայուն զարգացման գործում։
Խուդաթյանը նշել է, որ վերջին տարիներին Հայաստանում իրականացվում են լայնածավալ ծրագրեր, ներառյալ «Հյուսիս-հարավ» մայրուղու կառուցումը, որը միացնում է Իրանի և Վրաստանի սահմանները։ Նա նաև ընդգծել է «Խաղաղության խաչմերուկ» նախագծի ռազմավարական նշանակությունը, որի նպատակն է ապաշրջափակել տարածաշրջանային տրանսպորտային կապերը և Հարավային Կովկասը վերածել առանցքային տարանցիկ հանգույցի։
Նախարարը հավելել է, որ «Տրանսկասպյան միջազգային տրանսպորտային երթուղու» համակարգման հարթակի ամրապնդումը և դրա գործառնականության ընդլայնումը կնպաստեն տարածաշրջանում խաղաղության, կայունության և բարգավաճման հաստատմանը։