Արցախյան նոր պատերազմի սկսվելու առաջին օրից Արթիկ քաղաքում սկսվել և շարունակվում են նախաձեռնությունները և ակցիաները, որոնք աջակցում են մեր բանակին։ Արդեն չորրորդ օրն է Արթիկի՝ Վարազ Սամուելյանի անվան մշակույթի տան գեղանկարչության սաները իրենց վրձինն են զենք դարձրել։ Մշակույթի տունը իր սաների հետ կազմակերպում է նկարների բարեգործական վաճառք, որի ամբողջ հասույթը կփոխանցվի «Հայաստան» Համահայկական Հիմնադրամին: Յուրաքանչյուր նկար սիմվոլիկ գին ունի՝ 1500 դրամ, բայց ավել վճարողներ էլ կան։
Կամավորներից Արենի խոսքով՝ առաջին օրը արել են նախապատրաստական աշխատանքներ և հասկացել, որ նախաձեռնությունը բավական արդյունավետ է։ «Մարդիկ հետաքրքրված են, բայց մեր ակցիան անսպասելի սկսվեց, քաղաքացիներից շատերը գումարը տալիս են, բայց նկարը չեն վերցնում»,- պատմում է Արենը։
Ցուցահանդես-վաճառքի գործերում կան նաև հայրենասիրական մոտիվներով նկարներ։ Սաները զուգահեռ նկարում են, գունավորում և վաճառում։
Կամավորներից Լիլիթը նշում է՝ քանի որ չի կարող զենք վերցնել և կանգնել հայրենիքի պաշտպանների կողքին, այսպես է օգնում։ «Մենք ամեն դեպքում ուզում էինք մի բանով օգնել , քանի որ պատերազմից մի քանի օր առաջ կազմակերպել էինք ցուցահանդես, մտածեցինք՝ հենց այդ նկարներն էլ վաճառել»,- պատմեց Լիլիթը։
Ցուրտ եղանակի պատճառով խումբը որոշել է ակցիան օնլայն շարունակել։ Օնլայն եղանակով նկարներն ավելի արագ են վաճառվում, և քաղաքացիները ավելի ակտիվ են այս հարթակում։
«Կարելի է համարել, որ մեր ծրագիրը արդարացրել է իրեն»,- շեշտում է Արենը։
Ահա այսպես ինչքան շատ նկար, այնքան ավելի հզոր զենք, ավելի շուտ հաղթանակ՝ վստահ են մշակույթի տան սաները։
Այս օրերին յուրաքանչյուր քաղաքացի պարտավոր է իր ջանքերը ներդնել ի նպաստ հաղթանակի։ Իսկ ինչպես բազմիցս շեշտել եմ հաղթանակը պարտադիր մերն է լիելու։
Հեղինակ՝ Շողակաթ Կակոյան