Երեկ Ախալքալաքի շրջանի Բուղաշեն գյուղի երիտասարդները «Զորի Զորյան» երիտասարդական միության անդամների հետ միասին հավաքվել են Արցախյան ազատամարտիկ Միքայել Ավագյանի կիսանդրու մոտ ընդդեմ ադրբեջանական սադրանքի, հաղորդում է Akhaltskha.net-ը:
Երիտասարդների խոսքերով` այսօր նրանք նաև Ախալքալաքի քաղաքապետարան էին այցելել հայտնելու համար իրենց վճռական դիրքորոշումը հուշարձանի ճակատագրի վերաբերյալ:
«Ադրբեջանական լրատվամիջոցների ու քաղաքական գործիչների հակահայկական աղմուկին այսօր միացավ նաև Վրաստանի ադրբեջանական համայնքը պահանջելով ապամոնտաժել մեր հերոս համագյուղացու կիսանդրին: Չտրվելով նրանց սադրանքներին մենք մեր հավաքով ուզում ենք ասել, որ ցանկացած գնով թույլ չենք տա կիսանդրու ապամոնտաժումը:
Նաև ուզում ենք մեր երախտիքի խոսքը հայտնել Վրաստանի իշխանություններին, որոնք մինչև այս պահը չեն տրվել ադրբեջանական սադրանքին և պահպանում են շատ հավասարակշռված դիրքորոշում, որպեսզի լարվածություն չառաջանա մեր շրջանում: Դրան է ձգտում ադրբեջանական պետությունը և համայնքը ու մեկ անգամ ևս կրկնում եմ, որ մենք պաշտպանելու ենք կիսանդրին և չենք տրվելու ադրբեջանական սադրանքին»,- ասել է Բուղաշեն գյուղի երիտասարդներից մեկը ու ավելացրել, որ հարկ եղած պարագայում պատրաստ են նաև հանրահավաք անցկացնել:
ԽՈՐՀՈւՐԴ Է ՏՐՎՈւՄ ԿԱՐԴԱԼ
