Այդ հարցը վերջին շրջանում բազմաթիվ, ընդհուպ քաղաքական շահարկումների տեղիք է տվել։ Այս մասին ասյօր՝ հունվարի 23-ին՝ կառավարության նիստի ժամանակ, ասաց ՀՀ վարչապետ Նիկոլ Փաշինյանը՝ անդրադառնալով Արմաթ լաբորատորիաների ծրագրին:
Վարչապետը տեղեկացրեց, որ այն Հայաստանում սկսվել է 2014թ. և 2014-2017թթ., պետական բյուջեից ֆինանսավորվել է 188 միլիոն դրամ, 2018-2019թթ. ֆինանսավորվել է մեկ միլիարդ 296 միլիոն դրամ, այսինք՝ երեք տարվա ընթացքում 188 միլիոն դրամ, երկու տարվա ընթացքում՝ մեկ միլիարդ 296 միլիոն դրամ, այդ թվում պետական բյուջեի հավելյալ հավաքագրված եկամուտներից։
«Մինչև հեղափոխությունը երկրում երեք տարվա ընթացքում բացվել է 220 ինժեներական լաբորատորիա, հեղափոխությունից հետո՝ 355 Արմաթ լաբորատորիա»,-հավելեց նա։
Վարչապետը պարզաբանեց, որ նշանակում է՝ մեկուկես տարվա ընթացքում կրկնակիից ավելի, ֆինանսավորումն ավելացվել է մոտ տասը անգամ։
«Եվ մեզ այսօր մեղադրում են, որ Արմաթ լաբորատորիաների հետ կապված պրոբլեմ ենք առաջացնում: Ինչու՞մ է այդ պրոբլեմը. շատ պարզ բանի մեջ է՝ մենք այսօր հանրապետությունում ունենք 575 լաբորատորիա, որոնք ձեռք են բերվել մի կազմակերպությունից: Ասում ենք հետևյալը, որ մի պահ պետք է դադար վերցնենք, վերլուծենք, թե ինչպես է աշխատում այդ համակարգը:
Կառավարության նիստում հանձնարարել եմ, որ պետք է խուսափենք մեկ անձից գնումներ կատարելուց և անենք մրցույթային կարգով, այդ վերլուծությունների արդյունքում ձևավորենք տեխնիկական առաջադրանք, որից հետո մրցութային կարգով իրականացնենք այդ լաբորատորիաներ ձեռքբերումը: Այսինքն՝ մենք ուզում ենք ասել, որ այս դպրոցներում պատրաստվում ենք ստեղծել լաբորատորիաներ՝ մրցույթների միջոցով, և ով կտա բովանդակություն-գին լավագույն առաջարկը՝ այդ կազմակերպությունն էլ կհաղթի»,-ասաց նա:
Նիկոլ Փաշինյանն ասաց, որ ներկայացված վիճակագրությունն ամեն ինչ ցույց է տալիս:
«Ես չեմ հասկանում, թե այդ ովքեր են, որ մեզ մեղադրում են, որ Արմաթ լաբորատորիաների հետ կապված՝ դպրոցների տեխնոլոգիական առաջընթացին խոչընդոտում ենք։ Այս թվերը իրենք թող հրապարակեն, որից հետո էժան շահարկումների դաշտ մտնեն»,-ասաց նա:
![](https://azat.tv/wp-content/uploads/2022/09/azattvlogoblack.png)