Օրենքի առաջ բոլորը հավասար են, մեղադրանք է առաջադրվել և իրավական մարմիների տիրույթում է․ իրենք թող քննեն տեսնեն ու իրենց կարծիքը ներկայացնեն: Այս մասին այսօր՝ մարտի 3-ին, Ազգային ժողովում լրագրողների հետ զրույցում ասաց ԲՀԿ ղեկավար Գագիկ Ծառուկյանը՝ անդրադառնալով Աբովյանի քաղաքապետ Վահագն Գևորգյանին առաջադրված մեղադրանքին:
Նշենք, որ Աբովյան համայնքի ղեկավարին մեղադրանք է առաջադրվել համայնքային հողամասերի զավթումը, շինությունների ինքնակամ կառուցումը կասեցնելու, կանխարգելելու ուղղությամբ միջոցներ չձեռնարկելու համար:
Անդրադառնալով դիտարկմանը, որ ինքն է բարձրահարկեր կառուցել՝ նա նշեց, որ բոլոր հողատարածքների տերերի հետ պայմանավորվածություն եղել է:
«Հեղափոխությունը, տնտեսական հեղափոխությունը միայն խոսքերով չէ, պետք է քայլեր կատարվեին, որ մարդիկ վերադարձի ժամանակ մնալու տեղեր ունենային: Ես ցանկացել եմ օրինակ ծառայել, հիմա պատճառներ ու պրոբլեմներ են սարքում, մեղքն իրենց վիզը: Ես իմ խոսքի տերն եմ եղել, իմ գործերը կատարել եմ: Այսօր ամբողջ պետությունը չի կարողացել վեց ամսվա մեջ 20 հատ բարձրահարկ շենք կառուցել: Հիմա ի՞նչ, ուզում են այնտեղ էնպես անեն, թե իբր կեսն ապօրինի շինություն է, 20 սմ դուրս է եկել, չգիտեմ ինչ է արել: Պետք է կդադարեցնեմ, ես այդպիսի խնդիր չունեմ: Իմ քայլը որպես մարդ կատարել եմ, մնացածը իրավական տիրույթում է, թող քննեն»,-ասաց Ծառուկյանը:
Հարցին, թե արդյո՞ք աջակցելու է Գևորգյանին, նա ասաց, որ օրենքի առաջ ոչ ոք չի կարող աջակցվել:
Դիտարկմանը, որ «Ոչ»-ի ճամբարը դիմել է իրենց՝ հանձնաժողովներում անդամներ ունենալու համար, իսկ նրանք որոշել են չաջակցել, Գագիկ Ծառուկյանը արձագանքեց, որ դիմել են միայն Նաիրա Զոհրաբյանին՝ առանց փաստաթղթի:
«Մենք քանի որ քաղաքական որոշում ենք ունեցել, որ չենք մասնակցելու քարոզարշավին, արդեն անիմաստ էր մեր ասելուց հետո խառնվեինք, դրանով զբաղվեինք: Բայց մեր համակիրներն ազատ քվեարկության օրը, կարող են գնալ մասնակցել, իսկ հանձնաժողովներին՝ ո՛չ, չենք մասնակցելու»: