ԵԿՄ նախկին նախագահ, գեներալ Մանվել Գրիգորյանի սրտի ռիթմը եթե կարգավորվեց, ապա կրիտիկական փուլը կանցնենք, եթե ոչ, ապա սրտի կանգ կարող է արձանագրվել։ Այս մասին այսօր՝ հունվարի 16-ին հայտնել է Գրիգորյանի պաշտպան Արսեն Մկրտչյանը։
«Հիվանդությունը կրիտիկական է։ Անցել են ակտիվ բուժման։ Եթե սրտի ռիթմը կարգավորվեց ապա նշանակում է վատ փուլն անցանք, թե չէ, ապա սրտի կանգն կարող է արձանագրվել։ 48 ժամվա մեջ դեղի ազդեցության հարցը կերևա, այսօր կեսօրին պարզ կլինի կկարգավորվի՞, թե՞ ոչ»,- ասաց Մկրտչյանը։
Հիշեցնենք, որ երեկ ՀՀ դատախազության նախաձեռնությամբ, Երևան քաղաքի ընդհանուր իրավասության դատարանում, դատավոր Մնացական Մարտիրոսյանի նախագահությամբ, Գրիգորյանի խափանման միջոցի փոփոխման վերաբերյալ արտահերթ դատական նիստ հրավիրվեց և Գրիգորյանն ազատ արձակվեց։
Ավելի վաղ հայտնել էինք, որ Մանվել Գրիգորյանը արդեն 2 օր է, որ է «Նաիրի» ԲԿ-ի վերակենդանացման բաժնում է։ Ըստ պաշտպանների՝ նրա վիճակը ծանր է, նրան միացված է արհեստական շնչառության սարք։
Մանվել Գրիգորյանը մեղադրվում է ապօրինի զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ դրամի հարկերի վճարումից խուսափելու, պետական միջոցներից ավելի քան 1 միլիարդ դրամ վատնելու և շորթմամբ 37 միլիոն դրամ արժողությամբ գույքի հափշտակությունը կազմակերպելու մեջ:
Աղբյուրը՝ News.am
