Ֆուտբոլային ակումբ «Բարսելոնան» ակտիվացրել է միջազգային տաղանդների որոնման իր ռազմավարությունը՝ ուշադրության կենտրոնում պահելով վեց երիտասարդ խաղացողների Եվրոպայից և Ամերիկայից: Ինչպես հաղորդում է Barca Universal-ը, մարզական տնօրեն Դեկոյի և սկաուտական ծառայության ղեկավար Ժոաու Ամարալի մշակած մոտեցումը միտված է հայտնաբերելու խոստումնալից խաղացողներին վաղ տարիքում՝ խուսափելու հետագայում չափազանց բարձր տրանսֆերային արժեքներից և ակումբում նրանց հաջող զարգացումն ապահովելու համար:
Ակումբը նմանատեղ մոտեցում է կիրառել Համզա Աբդելկարիմի և Ջեսի Բիսիվուի ձեռքբերման գործընթացում: Այս անգամ թիրախում են հայտնվել տարբեր երկրների առաջնությունների հարձակվողներ և պաշտպաններ, չնայած եվրոպական այլ գրանդների մրցակցությունն ու ֆինանսական պահանջները ստեղծում են որոշակի բարդություններ:
Եվրոպական ուղղություն. Մանչեսթեր Յունայթեդ և Նորվեգիա
Միջազգային մամուլի և սկաուտների ուշադրության կենտրոնում է գտնվում 16-ամյա Ջեյ Ջեյ Գաբրիելը: Հրաժարվելով ստորագրել իր առաջին պրոֆեսիոնալ պայմանագիրը «Մանչեսթեր Յունայթեդի» հետ՝ պատանի հարձակվողը հետաքրքրություն է առաջացրել «Բարսելոնայի», Մադրիդի «Ռեալի», «Բավարիայի» և ՊՍԺ-ի կողմից: Թեև Գաբրիելի շրջապատը հակված է տեղափոխվել Իսպանիա, տրանսֆերային ընդհանուր արժեքը, ներառյալ աշխատավարձը և միջնորդավճարները, կարող է գերազանցել 10 միլիոն եվրոն:
Նորվեգիայում 15-ամյա հարձակվող Գաբրիել Ռայկովիչը գրավել է Barca Universal-ի ուշադրությունը, երբ ակումբի սկաուտները հետեւել են նրա խաղին «Բուդյո-Գլիմտի» դեմ մրցավեճում: Ռայկովիչը պատմություն է մտել որպես Նորվեգիայի բարձրագույն խմբի պատմության ամենաերիտասարդ գոլի հեղինակը՝ 15 տարեկան, 5 ամսական և 15 օրական հասակում: Նրանով հետաքրքրված են նաև Անգլիայի Պրեմիեր լիգայի առաջատար ակումբները:
Միևնույն ժամանակ, «Ֆուլհեմի» 19-ամյա պաշտպան Ջոշ Քինգը ամրապնդել է տեղը հիմնական կազմում: Լոնդոնյան ակումբի հետ մինչև 2029 թվականը գործող պայմանագիր ունեցող Քինգը գտնվում է նաև «Չելսիի», «Լիվերպուլի», «Մանչեսթեր Յունայթեդի» և այլ թոփ ակումբների տեսադաշտում:
Հարավային Ամերիկա և ԱՄՆ թիրախներ
Կատալոնական ակումբի սկաուտական ցանկում կարևոր տեղ են զբաղեցնում նաև ամերիկյան մայրցամաքի տաղանդները: Արթուր Դիասը, ով 19 տարեկան է և հանդես է գալիս պաշտպանի դիրքում, որպես ավագ գլխավորել է Բրազիլիայի հավաքականը մինչև 20 տարեկանների Հարավային Ամերիկայի 2025 թվականի առաջնությունում և արժանացել հիմնական հավաքականի հրավերին՝ Կառլո Անչելոտիի գլխավորությամբ:
16-ամյա հարձակվող Էդուարդո Կոնսեյսաոն՝ «Պալմեյրասից», նույնպես գրավել է Դեկոյի ուշադրությունը՝ իր խաղային բազմակողմանիության շնորհիվ: Չնայած նախնական քննարկումներին, անգլիական ակումբների մրցակցությունը և բարձր ֆինանսական պահանջները ստիպել են «Բարսելոնային» ժամանակավորապես դուրս գալ բանակցություններից:
ԱՄՆ-ի ՄԼԼ-ում հանդես եկող 17-ամյա Կավան Սալիվանը դարձել է ԱՄՆ-ի հավաքականի պատմության ամենաերիտասարդ գոլի հեղինակը: Այդուհանդերձ, նրա տեղափոխության հարցում առկա է լուրջ խոչընդոտ, քանի որ «Մանչեսթեր Սիթին» դեռևս 2024 թվականին պայմանավորվածություն է ձեռք բերել «Ֆիլադելֆիա Յունիոնի» հետ՝ խաղացողին 18 տարինրանալուն պես՝ 2027 թվականի սեպտեմբերի 28-ին պայմանագիր կնքելու մասին: