ՀՀ ՊՆ ներկայացուցիչ Արծրուն Հովհաննիսյանն այսօր ևս ներկայացրել է ռազմաճակատում տիրող իրավիճակը: ՀՀ ՊՆ ներկայացուցիչն ասել է, որ բացի առաջնագծի գործողություններից, հրթիռակոծվել են Մարտունին և Բերձորը՝ իրենց հարակից բնակավայրերով: Բերձորի տարածաշրջանում 3 արկ է ընկել։
«Օրվա ընթացքում հատկապես թեժ են եղել կենտրոնականից հարավ ընկնող՝ Շեխեր, Ջիվանիկ և հարակից գյուղերում դիվերսիոն ներթափանցման գործողություններ իրականացրած ադրբեջանական դիվերսիոն խմբերի չեզոքացման աշխատանքները: Այս ուղղությամբ կան հստակ հաջողություններ: Մասնավորաես՝ գրեթե լիովին մաքրվել է Շեխեր բնակավայրը՝ իր հարակից անտառներով, որոշ բնակավայրերի հարակից հատվածներում չեզոքացման այդ աշխատանքները շարունակվում են», – ասել է Հովհաննիսյանը:
Ըստ ՊՆ ներկայացուցչի՝ հարավային ուղղությամբ ադրբեջանական ստորաբաժանումները մի քանի գրոհներ են կատարել Որոտանի ուղղությամբ: Որոշ ստորաբաժանումներ թողել են տեխնիկան: Բերձորից հառառակորդին հետ են մղել՝ դեպի հարավ: Լարվածությունը պահպանվում է: Հակառակորդը փորձում է հարձակումներ իրականացնել որոշ ճանապարհների, գետերի ուղղությամբ, այդ հարձակումները չեզոքացվում են: Մարտերը օջախային բնույթ են կրում, ՀՀ ԶՈւ-ն լիովին տիրապետում է իրավիճակին՝ չնայած այն հանգամանքին, որ հակառակորդը որոշ տեղերում ունի առաջխաղացում: