Քենթոնի (Օհայո նահանգ) դատարանը ուրբաթ օրը 3 միլիոն դոլար գրավ է սահմանել 46-ամյա Դարել Վաշինգտոնի համար, որը մեղադրվում է ծանրացուցիչ հանգամանքներում կատարված սպանության և հրկիզման մեջ: Վաշինգտոնը կասկածվում է 42-ամյա Քատինա Սփելսի և 31-ամյա Քորթնի Յեգերի մահվան մեջ, որոնց մարմինները հայտնաբերվել են օգոստոսի 9-ին բնակելի շենքերից մեկում:
Քենթոնի ոստիկանության պետ Ջոն Գաբարդի հաղորդմամբ՝ ոստիկանությունը կանչ է ստացել օգոստոսի 9-ին, ժամը 10:00-ի սահմաններում, երբ Քենթոնի հրշեջ ծառայությունը, հրդեհի մարման աշխատանքների ընթացքում, հայտնաբերել է երկու կնոջ դիակ: Գաբարդը նշել է, որ զոհերը ստացել են հրազենային վնասվածքներ և ծանր այրվածքներ:
Դարել Վաշինգտոնը, որը ձերբակալվել է ԱՄՆ Մարշալների ծառայության կողմից օգոստոսի 12-ին Նյու Ֆիլադելֆիայում, ուրբաթ օրը Քենթոնի մունիցիպալ դատարանում իրեն մեղավոր չի ճանաչել: Նա մնում է կալանքի տակ:
Գործով անցնում են ևս երկու կասկածյալներ: Քենթոնի բնակիչ, 43-ամյա Էրիկ Լամարը, ինքնակամ ներկայացել է ոստիկանություն օգոստոսի 11-ին: Նրան մեղադրանք է առաջադրվել հրկիզման, ապացույցների ոչնչացման և արդարադատությանը խոչընդոտելու համար: Դատարանը նրա համար սահմանել է 2 միլիոն դոլար գրավ: Երրորդ կասկածյալը՝ 41-ամյա Մելիսա Թերելը, դեռևս գտնվում է հետախուզման մեջ:
Իրավապահները հորդորում են ցանկացած տեղեկություն ունեցողներին կապ հաստատել Քենթոնի ոստիկանության հետ (330-649-5800 կամ 330-489-3144):