Այսօր շատ կարևոր օր է, քանի որ տասնամյակների պայքարից հետո Ներկայացուցիչների պալատը կճանաչի Հայոց ցեղասպանությունը։ Այս մասին իր ելույթում ասել է ԱՄՆ Ներկայացուցիչների պալատի անդամ Բրեդ Շերմանը Հայոց Ցեղասպանությունը ճանաչող բանաձևի քննարկման ժամանակ:
Նա ընդգծել է, որ դա տեղի կունենա 20-րդ դարի առաջին ցեղասպանության վերապրածների վերջին սերունդի աչքի առաջ:
«Երկու շաբաթ առաջ ես մոտեցա այս նույն ամբիոնին և ասացի, որ վերջապես ժամանակն է ճանաչել Հայոց ցեղասպանությունը»,-ասաց Շերմանը՝ նկատելով որ արդեն եկել է Թուրքիային սիրաշահելու ժամանակների ավարտը:
Նրա խոսքով՝ վաղուց էր հարկավոր ճանաչել Հայոց ցեղասպանությունը, սակայն միշտ ասում էին, որ պետք չէ դա անել, քանի որ Թուրքիայի հետ կարևոր դաշնակցային հարաբերություններ ունենք:
«Այս ամսվա սկզբին նրանք ռմբակոծեցին ամերիկյան ռազմաբազայի շուրջբոլորը: Բոլորի համար ակնհայտ էր, որ նրանք պատրաստ են սպանել ամերիկացիների: ԱՄՆ-ը հետ քաշվեց, սակայն դա լավ պլանավորված ու զգույշ հեռացում չէր: Մենք լքեցինք թուրքական ռմբակոծության ու սպառնալիքների պատճառով: Մի՞թե սրանք են իրական դաշնակցային հարաբերությունները»,-ասաց Բրեդ Շերմանը՝ հավելելով, որ ԱՄՆ-ն միշտ աջակցել է Թուրքիային:
Նա նշեց, որ 1915-1923 թվականներին Օսմանյան կայսրությունը սպանել է 1.5 միլիոն հայ, որը 20-րդ դարի առաջին ցեղասպանությունն էր, և որևէ կասկած չկա, որ դա տեղի է ունեցել:
«1.3-1.5 միլիոն հայերի ջարդը 20-րդ դարի մեծագույն հանցագործություններից մեկն էր, և այստեղ որևէ բանավեճ լինել չի կարող»,-նշեց Շերմանը։
Նա շեշտեց, որ Ռաֆայել Լեմկինը, որն առաջին անգամ ներկայացրել է ցեղասպանություն բառը, ասել է, որ Հայոց ցեղասպանությունը դրա առաջին օրինակն էր:
«Ժամանակն է, որ մենք ճանաչենք Հայոց ցեղասպանությունը, քանի որ դրա ժխտումը ցեղասպանության վերջին բաղկացուցիչ ակտն է»,-ընդգծեց ԱՄՆ Ներկայացուցիչների պալատի անդամը։
ԽՈՐՀՈւՐԴ Է ՏՐՎՈւՄ ԿԱՐԴԱԼ
