Հայաստանի տարածքում ձյան, մերկասառույցի և վատ եղանակային պայմանների պատճառով մի շարք ավտոճանապարհներ մնացել են փակ կամ դժվարանցանելի: Արագածոտնի մարզում դեպի «Ամբերդ» բարձր լեռնային օդերևութաբանական կայան և Քարի լիճ տանող ճանապարհը մնում է փակ: Վարդենյաց լեռնանցքը դժվարանցանելի է բոլոր տեսակի տրանսպորտային միջոցների համար, իսկ կցորդիչով բեռնատարները կարող են անցնել միայն անվաշղթաների կիրառման դեպքում։
Սպիտակի ոլորաններում, ինչպես նաև Ստեփանավան-Վանաձոր և Վանաձոր-Դիլիջան ճանապարհներին կցորդիչով բեռնատարների երթևեկությունը դժվարանցանելի է։ Հատկապես ձնառատ է Ծիլքար գյուղում, Վարդենյաց լեռնանցքում, Լանջանիստ, Լուսաշող և Լանջառ գյուղերում, ինչպես նաև Սարավան-«Զանգեր» և «Մեղրու սար» հատվածներում։ Մերկասառույց է նկատվում Սյունիքի մարզի որոշ հատվածներում, ինչպես նաև Երևան-Սևան ճանապարհին։
Արարատի մարզում և Երևան-Սևան ավտոճանապարհին առկա է մառախուղ, ինչը նվազեցնում է տեսանելիությունը։ Փրկարար ծառայությունը խորհուրդ է տալիս վարորդներին օգտագործել բացառապես ձմեռային անվադողեր՝ իրենց և մյուսների անվտանգությունը ապահովելու համար։
Ըստ Վրաստանի և Ռուսաստանի արտակարգ իրավիճակների կառույցներից ստացված տվյալների՝ Ստեփանծմինդա-Լարս ավտոճանապարհը բաց է բոլոր տեսակի տրանսպորտային միջոցների համար:
