«Արսենալի» գլխավոր մարզիչ Ունայ Էմերին տեղեկացրել է, որ ձմեռային տրանսֆերային պատուհանի ընթացքում լոնդոնյան ակումբում համալրումներ չեն լինի:
Ավելի վաղ շրջանառվող լուրերի համաձայն՝ «Արսենալի» դիտակետում էին Իվան Պերիշիչը, Դենիս Սուարեսը և Մալկոմը:
«Ակումբում ինձ ասում են, որ այժմ նպատակահարմար չէ գնել նոր ֆուտբոլիստների:
Միևնույն ժամանակ ինձ վստահեցնում են, որ ամռանն ամեն ինչ այլ է լինելու, և մենք շատ գումար ծախսելու հնարավորություն ենք ունենալու: Ինձ համար հեշտ կլինի պահանջել շատ ֆուտբոլիստների, սակայն ես հաճույք եմ ստանում ներկայիս կազմի հետ աշխատանքից: Իմ նպատակն է «Արսենալի» ֆուտբոլիստներին ավելի լավը դարձնել:
Գոհ եմ իմ ֆուտբոլիստներից: Նրանք ունեն անհրաժեշտ որակները Պրեմիեր լիգայում և Եվրոպա լիգայում հաջողության հասնելու համար: Առաջնությունում մենք ձգտում ենք տեղ զբաղեցնել լավագույն քառյակում»,- Էմերիի խոսքը մեջբերել է Goal.com-ը:
Հիշեցնենք, որ Անգլիայի Պրեմիեր լիգայի 23-րդ տուրից հետո «Արսենալն» ունի 44 միավոր և զբաղեցնում է մրցաշարային աղյուսակի 5-րդ հորիզոնականը:
Հաղորդում է armsport.am-ը։