Հայաստանում ԵՄ պատվիրակության ղեկավար, դեսպան Պյոտր Սվիտալսկին այսօր ասել է, որ Արևելյան գործընկերության տասը տարիներին արձանագրվել են շոշափելի և կարևոր արդյունքներ։
Երևանում տեղի ունեցած ԵՄ Արևելյան գործընկերության 10-ամյակին նվիրված համաժողովում Պյոտր Սվիտալսկին ընդգծել է, որ ԱլԳ նախաձեռնության մեկնարկը շատ կարևոր էր՝ խթանելու ԵՄ հարաբերությունները արևելյան գործընկեր երկրների հետ։
Դեսպանի խոսքով՝ տարատեսակ և բազմաշերտ ծրագրերի միջոցով դրական արդյունքներ են գրանցվել ԱլԳ անդամ երկրների՝ տրանսպորտի, կրթության, լավ կառավարման, բիզնեսի խթանման, աշխատատեղերի ստեղծման և մի շարք այլ ոլորտներում։
«Այսօր Բրյուսելում փորձագետներն ու ղեկավարությունը վայելում են արդյունքները, որոնք արձանագրվել են գործընկերության տասը տարիներին»,- նկատել է Պյոտր Սվիտալսկին։
Դեսպանը նշել է, որ Արևելյան գործընկերության անդամ վեց երկրներից (Հայաստան, Ադրբեջան, Բելառուս, Վրաստան, Մոլդովա, Ուկրաինա) հինգին ԵՄ-ն համարում է անվտանգության երաշխավորող, քանի որ ներգրավված են իրական կոնֆլիկտներում և պատերազմերում։
«Նրանք ԵՄ-ին հարցնում են, թե ինչպիսի օգուտներ կարող են ունենալ՝ անվտանգությունը խթանելու համար, որ լուծեն իրենց հակամարտությունները։ Այս թեման արժանի է աչալուրջ քննարկման»,- ասել է դեսպանը։
ՀՀ ԱԳՆ Եվրոպական վարչության պետ Տիգրան Սամվելյանն էլ նշել է, որ Արևելյան գործընկերությունն իր գոյության տասը տարիների ընթացքում նշանակալի ներդրում է ունեցել ՀՀ-ԵՄ գործընկերության հետագա խորացման և ամրապնդման ուղղությամբ։