2024 թվականի մայիսին տեղի ունեցած արևային հզոր գերփոթորիկը, որը Երկրի վրա առաջացրել էր հազվագյուտ բևեռափայլեր, զգալի ազդեցություն է ունեցել նաև Մարսի վրա։ Եվրոպական տիեզերական գործակալության (ESA) «Mars Express» և «ExoMars Trace Gas Orbiter» (TGO) կայանների տվյալների համաձայն՝ մոլորակի մթնոլորտի վերին շերտերում էլեկտրոնների խտությունը կտրուկ աճել է՝ որոշ բարձրություններում հասնելով մինչև 278 տոկոսի։
Հետազոտողները օգտագործել են ռադիոօկուլտացիայի մեթոդը, որի ժամանակ երկու տիեզերանավերի միջև ռադիոազդանշաններ են փոխանակվել Մարսի հորիզոնի երկայնքով։ Սա թույլ է տվել ճշգրիտ չափել, թե ինչպես է արևային ճառագայթումը փոխազդում մոլորակի մթնոլորտի հետ։ Գիտնականները նշում են, որ սա ամենամեծ արձագանքն է, որ երբևէ գրանցվել է Մարսի վրա՝ արևային փոթորկի հետևանքով։
Այս տվյալները կարևոր են ոչ միայն Մարսի մթնոլորտի էվոլյուցիան հասկանալու, այլև ապագա տիեզերական առաքելությունները պլանավորելու համար։ Մթնոլորտի իոնացումը կարող է խոչընդոտել ռադարային և կապի ազդանշաններին, ինչը կարևոր գործոն է Մարսի մակերեսի ուսումնասիրության ժամանակ։