Ֆինլանդիան Իսրայելի հետ ստորագրել է 10 տարվա ժամկետով ռազմական փոխըմբռնման հուշագիր, որը նախատեսում է պաշտպանական հետազոտությունների, մշակումների և սպառազինությունների գնման ոլորտում համագործակցություն մինչև 2034 թվականը։ Այս մասին հայտնել է ֆիննական Yle հանրային հեռարձակողը՝ ընդգծելով, որ փաստաթղթի բացահայտումը քաղաքական լուրջ բանավեճ է առաջացրել Հելսինկիում։
Համաձայնագիրը 2024 թվականի սկզբին հաստատել է Ֆինլանդիայի պաշտպանության նախարար Անտի Հյակյանենը։ Այն փոխարինում է նախկինում գործող հուշագրին, որը թարմացվում էր հինգ տարին մեկ։ Ֆինլանդիայի պաշտպանական գերատեսչությունը ժամանակին հրապարակավ չէր հայտարարել համաձայնագրի ստորագրման մասին, ինչը դժգոհություն է առաջացրել ընդդիմադիր պատգամավորների շրջանում։
Նյութը պատրաստվել է calcalistech.com-ի հրապարակած տեղեկությունների հիման վրա։
Պաշտպանության նախարար Հյակյանենը Yle-ի հետ զրույցում պարզաբանել է, որ 10-ամյա հուշագիրը քաղաքականության կտրուկ փոփոխություն չէ, քանի որ Ֆինլանդիան նմանատիպ պաշտպանական համաձայնագրեր ունի շուրջ 40 երկրների հետ։ Նրա խոսքով՝ երկարաձգումը նպատակ ունի աջակցելու գոյություն ունեցող պաշտպանական ծրագրերին, այդ թվում՝ հակաօդային պաշտպանության համակարգերի ձեռքբերմանը։
Երկկողմ համագործակցության առանցքային նախագծերից է իսրայելական «Դավթի պարսատիկ» (David’s Sling) ՀՕՊ համակարգի գնումը, որի վերաբերյալ ավելի քան 300 միլիոն եվրոյի պայմանագիրը հաստատվել էր դեռևս 2023 թվականին՝ նախկին վարչապետ Սաննա Մարինի կառավարության օրոք։ Ֆինլանդիան դարձավ այս համակարգի առաջին օտարերկրյա պատվիրատուն ՆԱՏՕ-ում, և համակարգը շահագործման կհանձնվի առաջիկայում։
Բացի այդ, ֆիննական Patria ընկերությունը իսրայելական Rafael-ի հետ համատեղ ինտեգրում է Trophy ակտիվ պաշտպանության համակարգերը AMV XP 8×8 զրահամեքենաների վրա, ինչպես նաև օգտագործում է Spike հակատանկային հրթիռներ։ Yle-ի փոխանցմամբ՝ ներկայումս ֆիննական զինուժի և իսրայելական ընկերությունների մասնակցությամբ իրականացվում է շուրջ 23 համատեղ ծրագիր։
Հուշագրի երկարաձգումը սուր քննադատության է արժանացել ընդդիմադիր «Կանաչների լիգա» և «Ձախ դաշինք» կուսակցությունների կողմից։ «Կանաչների» ղեկավար Սոֆիա Վիրտան կառավարության քաղաքականությունն անվանել է անընդունելի՝ նշելով, որ Գազայի հակամարտության ֆոնին Հելսինկիին անհրաժեշտ էր խզել կամ սահմանափակել ռազմական կապերը Իսրայելի հետ, այլ ոչ թե խորացնել դրանք։ Ընդդիմադիր պատգամավորները մտադիր են պաշտոնական հարցապնդում ուղղել կառավարությանը՝ պարզելու, թե արդյոք վարչապետ Պետերի Օրպոն և արտգործնախարար Էլինա Վալտոնենը տեղյակ են եղել համաձայնագրի գաղտնի երկարաձգման մասին։