Ավելի քան 800 000 մարդ բողոքի ակցիաներ է անցկացրել Ֆրանսիայի տարբեր քաղաքներում:
Ինչպես նշում է The Guardian-ը, դժգոհության պատճառը նախագահ Էմանուել Մակրոնի՝ կենսաթոշակային համակարգում փոփոխություններ անելու ծրագիրն է: Գործադուլի մասնակիցները պնդում են, որ Մակրոնի ծրագրի իրագործման դեպքում միլիոնավոր մարդիկ ստիպված կլինեն ավելի երկար աշխատել ու ավելի քիչ գումար ստանալ:
Պարբերականը նշում է, որ տրանսպորտային ոլորտի աշխատակիցների գործադուլի հետևանքով դադարեցվել են գնացքների, մետրոյի և ավտոբուսների աշխատանքը, չեղարկվել են որոշ չվերթներ:
Մայրաքաղաք Փարիզում ոստիկանությունը բախվել է մի խումբ ցուցարարների հետ և արցունքաբեր գազ կիրառել: Ցուցարարներից ոմանք ջարդուփշուր են արել ավտոբուսների կանգառները, խանութների ապակիները, շրջել են կայանված մեքենաները, հրկիզել են աղբամանները: Ընդհանուր առմամբ, ձերբակալվել է 70 մարդ:
Փարիզյան ցույցին մասնակցել են բուժաշխատողներ, էներգետիկ ոլորտի աշխատողներ, հրշեջներ, ուսուցիչներ, աշակերտներ, որոնք ծածանել են «Մակրո՛ն, հեռացի՛ր» գրությամբ պաստառներ:
«Սա կյանքի և մահվան հարց է Ֆրանսիայի սոցիալական համակարգի համար, որը Մակրոնը կազմաքանդում է: Մեզ վերադարձնում են 1945թ.-ից առաջ ընկած ժամանակահատված, երբ սոցիալական ապահովության ցանցը կորցնելու վտանգի առաջ էինք»,-ասել է 20 տարի Փարիզի քաղաքապետարանում աշխատող Իզաբել Ժարիվեն, որի պնդմամբ՝ օդում թևածում է ըմբոստության տրամադրությունը:
ԽՈՐՀՈւՐԴ Է ՏՐՎՈւՄ ԿԱՐԴԱԼ
