Ֆրանսիական «Orange Cinema Series»-ը պատմել է «Գահերի խաղը»(GOT) հեռուստասերիալի վերջին եթերաշրջանի ժամանակացույցի մասին: Այս մասին հաղորդում է «Premiere» ամսագիրն իր «Twitter»-ի էջում:
Սեզոնի առաջին սերիան կտևի շուրջ մեկ ժամ: Հաջորդ չորս սերիաների տևողությունը կլինի 80 րոպե: Հնարավոր է, որ վերջում դրվագների տևողությունը փոխվի, քանի որ շարքի ստեղծողները դեռ շարունակում են աշխատել վերջնական եթերաշրջանի վրա: «HBO» ամերիկյան հեռուստաալիքի կողմից, սերիալի ժամանակացույցի վերաբերյալ պաշտոնական հաստատում կամ հերքումը դեռ չի եղել:
Իսկ «Entertainment Weekly» ամսագիրը նշում է, որ 80 րոպեանոց դրվագի թողարկման համար նախագծի պրոդյուսերները ստիպված կլինեն դիմել հեռուստաընկերությանը՝ հատուկ թույլտվության համար, քանի որ նման երկարատև դրվագները ազդում են հեռարձակման սխեմայի վրա: Հրատարակության լրագրողը նաև նշում է, որ վերջնական շարքը դժվար թե տևի հենց 80 րոպե:
Ավելի վաղ «HBO» հեռուստաալիքը հրապարակել էր կադրեր սերիալի վերջին եթերաշրջանից, որը ըստ նախատեսվածի էկրան կբարձրանա ապրիլին:
Նշենք, որ «Գահերի խաղ» հեռուստասերիալը նկարահանվել է Ջորջ Մարտինի «Սառույցի և բոցի երգ» ֆենթզիի հիման վրա: Գործողությունները տեղի են ունենում երկու հորինված մայրցամաքներում, որտեղ մի շարք արիստոկրատական ընտանիքներ պայքարում են Վեստերոսի յոթ թագավորություններին տիրանալու համար, մինչդեռ ողջ մարդկությունը կանգնած է այլ ուժերի ներխուժման վտանգի առաջ:
