Պոլ Գոգենի առաջին կտավը, որի վրա պատկերված է շվեյցարական շալե, Ֆրանսիայում կիրակի օրը աճուրդում վաճառվել է 80 հազար եվրոյով: Այս մասին տեղեկացնում է շվեյցարական Matin թերթը։
1865 թվականի նկարը ստորագրված էր հենց Գոգենի կողմից, ինչը պարզել է հետազոտությունը։ Ապագա նկարիչը պատկերել է Էռլենբախ իմ Զիմենթալի (Բեռնի Օբեռլանդ) շվեյցարական շալեն, երբ ընդամենը 17 տարեկան էր։ Գոգենն այն պատկերել է ուսուցչի կատարած էսքիզներից։ Շենքը նա պատկերել է Լուարի ափին, նաև պատկերել է իրեն՝ միակ տղամարդուն մի քանի կանանց շրջապատում, որոնք նայում են ջրին և հեռվում երևացող նավակին։
Սակարկությունները տեղի են ունեցել կիրակի, Rouillac աճուրդների տանը, Ֆրանսիայի կենտրոնում գտնվող Մոնբազոն քաղաքում։ Հաղթողը լոտը շահել է հեռախոսով։ Սակարկությունների ավարտից հետո տեղեկացվել է, որ կտավը «կվերադառնա Շվեյցարիա»։
Թերթը նշում է, որ կտավը նախկինում չի եղել Շվեյցարիայի տարածքում, այնտեղ միայն շալեն է գտնվել։ Ընդ որում՝ անորոշ է մնում, թե ով է գնել նկարչի առաջին կտավը։
Ֆրանս պրես գործակալության տվյալներով՝ նկարը ձեռք է բերել ֆրանսիացի մի գործարար, որն ապրում է Շվեյցարիայում։
Նշվում է նաև, որ աշխատանքը կատարվել է չինական թանաքով և ակվարելով Canson ընկերության թղթի վրա։ Աճուրդավար Էմերիկ Ռուայաքը տեղեկացրել է գործակալությանը, որ սա Գոգենի «առաջին հայտնի նկարն է», և դրա առկայությունը հերքում է «այն թեզիսը, թե Գոգենն ինքնուս է»։
