Եվրախորհրդարանի երկու շենքերը միացնող մարդաշատ հատվածում տեղադրված քանդակում պատկերված է մերկ Թրամփը՝ ձեռքին երկար գոլֆի մահակ, աշխարհի գնդի տեսք ունեցող գնդակ և արդարության խորհրդանիշ կշեռք։ Նա նստած է շատ ավելի փոքրամարմն մարդու ուսերին, ով, ըստ հորինվածքի, հոգնած է ծանրությունից։ Հիմքի վրա փորագրված գրությունը ներկայացնում է «Անարդարության արքային» վերագրվող հեգնական մեջբերում. «Ես նստած եմ մի մարդու մեջքին։ Նա սուզվում է իմ բեռի տակ։ Ես կանեմ ամեն ինչ՝ նրան օգնելու համար, բացի նրա մեջքից իջնելուց»։
Քաղաքական արձագանքներ և մեկնաբանություններ
Ցուցադրությունն անմիջապես ուշադրություն է գրավել և արժանացել հակասական քաղաքական գնահատականների։ Եվրախորհրդարանի դանիացի անդամ Պեր Կլաուսենը պաշտպանել է վիճահարույց արձանը հյուրընկալելու որոշումը՝ նշելով, որ քաղաքական հաստատությունները չպետք է գրաքննության ենթարկեն սադրիչ ստեղծագործությունները՝ առաջնորդներին չզայրացնելու համար։ Metro-ի համաձայն՝ Կլաուսենն հայտարարել է. «Եթե որևէ մեկն այնքան մաշկազգայուն է, որ չի կարող հանդուրժել այս քանդակի ցուցադրությունը Եվրախորհրդարանում, ապա նա անելիք չունի համաշխարհային ասպարեզում»:
Քանդակագործ Ենս Գալշիոտը ներկայացրել է աշխատանքը որպես Միացյալ Նահանգների արտաքին և բնապահպանական քաղաքականության հեգնական քննադատություն՝ Թրամփին բնութագրելով որպես սպառնալիք կանոնների վրա հիմնված միջազգային կարգին: Կերպարային հորինվածքը ոգեշնչված է Հանս Քրիստիան Անդերսենի «Թագավորի նոր զգեստը» հեքիաթով:
Ցուցադրության ժամանակացույց և հետագա քայլեր
Ստրասբուրգում ստեղծագործության ցուցադրությունը կարճատև է։ The Independent-ի տվյալներով՝ արձանը նախատեսված է պահել ցուցադրության մեջ մինչև հոկտեմբերի 8-ը։ Ավելի վաղ այն ցուցադրվել էր Բրազիլիայում կայացած COP30 կլիմայական համաժողովին և Մյունխենի անվտանգության համաժողովում:
Կազմակերպիչները նաև հայտարարել են նոյեմբերին Թուրքիայում կայանալիք ՄԱԿ-ի COP31 կլիմայական գագաթնաժողովին պատվիրակներին 3D տպագրությամբ պատրաստված մանրակերտեր բաժանելու ծրագրերի մասին: Միևնույն ժամանակ, Դոնալդ Թրամփը դեռևս հանրային արձագանք չի տվել Ստրասբուրգի ցուցադրությանը: