Մեն նահանգի սենատորի թեկնածու Գրեմ Պլատները հայտնվել է լուրջ ճնշման տակ՝ սեռական բռնության նոր մեղադրանքների ֆոնին:
Դեմոկրատական կուսակցության ղեկավարությունը պահանջում է Մեն նահանգից ԱՄՆ սենատորի թեկնածու Գրեմ Պլատներից դուրս գալ ընտրապայքարից: Պատճառը Ջենի Ռասիկոյի կողմից Politico-ին տված հարցազրույցն է, որում վերջինս մեղադրել է Պլատներին 2021 թվականին իր տանը սեռական բռնության ենթարկելու մեջ: Պլատներն, իր հերթին, հերքել է մեղադրանքները՝ դրանք անվանելով «բացարձակ կեղծ»:
Դեմոկրատական սենատորական քարոզարշավի կոմիտեն (DSCC) հայտարարել է, որ կդադարեցնի ֆինանսական աջակցությունը, եթե Պլատները չհրաժարվի թեկնածությունից: Կուսակցության բարձրաստիճան անդամներ, այդ թվում՝ սենատորներ Բեռնի Սանդերսը, Էլիզաբեթ Ուորենը և Քորի Բուքերը, հրապարակայնորեն կոչ են արել նրան դուրս գալ մրցապայքարից: Մի շարք կոնգրեսականներ և սենատորներ, այդ թվում՝ Ռո Խաննան և Ռուբեն Գալյեգոն, հետ են կանչել իրենց աջակցությունը՝ նշելով մեղադրանքների լրջությունն ու հավաստիությունը:
Հիշեցնենք, որ Պլատների քարոզարշավը նախկինում ևս ուղեկցվել է սկանդալներով: Նա քննադատության էր ենթարկվել նացիստական խորհրդանշան հիշեցնող դաջվածքի, սեռական բռնության զոհերի մասին արված հակասական մեկնաբանությունների և անձնական կյանքի հետ կապված սկանդալների համար: Ըստ օրենքի՝ Պլատները պետք է հրաժարական տա մինչև հուլիսի 13-ը, որպեսզի նրա անունը հանվի քվեաթերթիկներից, ինչը թույլ կտա դեմոկրատներին փոխարինող թեկնածու առաջադրել:
Նոյեմբերին կայանալիք ընտրություններում Պլատները պետք է մրցի հանրապետական սենատոր Սյուզան Քոլինզի հետ: Այս պահին Պլատների շտաբը հետաձգել է մի շարք միջոցառումներ՝ հայտարարելով, որ թեկնածուն «խորհում է հետագա քայլերի մասին»: