Ռուսաստանի նախագահ Վլադիմիր Պուտինն այսօր ասել է, որ հակամարտությունը Լեռնային Ղարաբաղում սկսվել է հայ ժողովրդի դեմ գործած հանցագործություններից:
Այսօր ելույթ ունենալով «Վալդայ» քաղաքագիտական ակումբի հանդիպմանը, Ռուսաստանի նախագահն ասել է.
«Այս հակամարտությունը սկսվեց ոչ թե որպես միջպետական հակամարտություն եւ տարածքների համար պայքար, այն սկսվեց էթնիկ դիմակայությունից: Ցավոք, սա փաստ է. Սումգայիթում, ապա Լեռնային Ղարաբաղում հայ ժողովրդի դեմ դաժան հանցագործություններ էին իրագործվել: Եվ այս ամենը մենք պետք է հանրագումարում հաշվի առնենք»:
Միևնույն ժամանակ, նշել է Պուտինը, «այն իրավիճակը, երբ Ադրբեջանի տարածքի զգալի մասի կորսված է, չի կարող հավերժ շարունակվել»:
«Երկար տարիներ Ռուսաստանը առաջարկում էր կարգավորման ամենատարբեր տարբերակներ՝ պատմական երկար ժամանակահատվածի համար իրավիճակը կայունացնելու համար: Դա մերձեցմանն ուղղված լարված աշխատանք էր: Որոշ պահերին թվում էր, թե ահա մի քիչ էլ, եւս մեկ քայլ, և մենք լուծում կգտնենք: Ցավոք, դա տեղի չունեցավ, և այսօր մենք ունենք հակամարտություն իր ամենավատ դրսևորմամբ», – ասել է Ռուսաստանի նախագահը:
«Ես շատ սերտ կապի մեջ եմ նախագահ Ալիևի և վարչապետ Փաշինյանի հետ: Ես նրանց հետ օրը մի քանի անգամ հեռախոսով եմ խոսում: Օրական մի քանի անգամ», – շեշտել է Պուտինը:
Խոսելով ԱՄՆ պետքարտուղարի հետ Հայաստանի և Ադրբեջանի արտգործնախարարների առաջիկա հանդիպման մասին ՝ Պուտինը հույս է հայտնել, որ «մեր ամերիկացի գործընկերները կաշխատեն մեզ հետ համերաշխ և կօգնեն այս հարցի կարգավորմանը»:
Ռուսաստանի նախագահը նաև ասել է, որ «մեր տվյալների համաձայն, ղարաբաղյան հակամարտության գոտում զոհվածների ընդհանուր թիվը մոտենում է 5 հազարին»:
ԽՈՐՀՈւՐԴ Է ՏՐՎՈւՄ ԿԱՐԴԱԼ
