Կրթական տեխնոլոգիաների ազգային կենտրոնը և Պարադիգմա կրթական հիմնադրամը կնքել են համագործակցության հուշագիր, որը նպատակ ունի խթանել հանրակրթության ոլորտի վերաբերյալ խորքային հետազոտությունների իրականացումը, ուսուցիչներին և ուսումնական գործընթացին աջակցող կրթական տեխնոլոգիաների մշակումը և տարածումը։
Կարևորելով կրթության ոլորտի զարգացմամբ շահագրգիռ կազմակերպությունների ջանքերի միավորումը՝ կողմերն արձանագրում են ուսուցիչների ոլորտային խնդիրների ուսումնասիրությունների կարևորությունը` ուսուցչին թիրախային աջակցություն տրամադրելու, ուսուցչի աշխատանքը և ուսումնական գործընթացը բարելավելու տեսանկյունից։
Որպես համագործակցության առաջին քայլ, «Պարադիգմա» կրթական հիմնադրամի կողմից այս տարվա հունիսին կազմակերպվող Edcamp Armenia 2019 կրթական առաջին համաժողովում կներկայացվեն ԿՏԱԿ-ի կողմից մշակված կրթական տեխնոլոգիաների գործիքակազմը և որոշ ուսումնասիրությունների արդյունքներ:
Այս մասին տեղեկանում ենք ՀՀ ԿԳՆ պաշտոնական կայքից։
