Մանկական ուռուցքաբանության միջազգային միության ասիական 15-րդ համաժողովի (SIOP Asia 2023 XV Congress) ծրագիրն արդեն ամբողջությամբ հասանելի է www.siopasia2023.am կայքում:
Համաժողովը 2023 թվականին անց է կացվելու Հայաստանում մայիսի 18-21-ը և հյուրընկալելու է մանկական ուռուցքաբանության համաշխարհային առաջատար մասնագետների, բժշկական և ուսումնական հաստատությունների ղեկավարների, ովքեր հանդես կգան զեկույցներով ու դասախոսություններով ոլորտի ամենաարդի զարգացումների շուրջ։
Համաժողովի 4 օրերը հագեցած են լինելու տարաբնույթ միջոցառումներով` սեմինարներ, քննարկումներ, աշխատարաններ (workshop), բանախոսություններ և սիմպոզիումներ, որոնք կանցկացվեն Երևանի պետական բժշկական համալսարանի տարածքում և մի շարք բժշկական հաստատություններում։
Հանրության համար բաց և անվճար կլինեն հետևյալ բացառիկ հանդիպումներն ու սեմինար-քննարկումները՝
– Մայիսի 20֊ին, ժամը 16:10 «Մանկական ուռուցքաբանության ոլորտի կին առաջնորդները» / “Women leadership in oncology” (անգլերեն), խոսնակների և թեմաների վերաբերյալ մանրամասները ներկայացված են հղումով՝ https://bit.ly/3obEwFp։
– Մայիսի 20-ին, ժամը 17։00 «Համաշխարհային առողջապահական համայնք» / “Global Health Network” (անգլերեն), խոսնակների և թեմաների վերաբերյալ մանրամասները ներկայացված են հղումով՝ https://bit.ly/3Bu2miQ։
– Մայիսի 19-ին, ժամը 19։30-ին՝ ի աջակցություն Մանկական ուռուցքաբանության միջազգային միության ասիական 15-րդ համաժողովի հանրայնացման` Հայաստանի պետական սիմֆոնիկ նվագախմբի համերգային ծրագիրը Երևանի պետական բժշկական համալսարանում։
Միջոցառումները նաև կհեռարձակվեն յութուբյան ալիքով, որի մասին տեղեկատվությունը կտեղադրվի միջոցառումների սոցիալական մեդիայի էջերում։
Աննախադեպ միջոցառումները հիանալի հնարավորություն են ծանոթանալու ոլորտի` հատկապես կին առաջնորդների հետ, ովքեր զգալի ներդրում ունեն համաշխարհային առողջապահության ոլորտում և որոնց տոկունությունը, հաստատակամությունը և ձախողումների դեմ հաղթանակի ուշագրավ պատմությունները իրական ոգեշնչման աղբյուր են դառնում շատերի համար:
Համաժողովի համակազմակերպիչներն են՝ Երևանի Մխիթար Հերացու անվան պետական բժշկական համալսարանը, Հայաստանի մանկական քաղցկեղի և արյան հիվանդությունների կենտրոնը, որը հանդիսանում է ՀՀ ԱՆ պրոֆ․ Ռ․Հ․ Յոլյանի անվան Արյունաբանական կենտրոնի մաս, Իմունաուռուցքաբանության գիտահետազոտական ինստիտուտը (IMMONC) և Սիթի օֆ Սմայլ բարեգործական հիմնադրամը։
Համաժողովն անց է կացվում ՀՀ Առողջապահության նախարարության աջակցությամբ։
Համաժողովի գլխավոր հովանավորներն են Agenus բիոտեխնոլոգիական ընկերությունը (ԱՄՆ) և Team Telecom Armenia ընկերությունը։
Հայաստանի մանկական քաղցկեղի և արյան հիվանդությունների կենտրոնի մասին տեղեկատվություն կարող եք գտնել սոցիալական մեդիայի էջերից՝
https://www.facebook.com/cancerarmenia
https://www.facebook.com/hematologycenterarmenia
Մանկական ուռուցքաբանության միջազգային միության ասիական կոնգրեսի մասին (SIOP Asia)
Մանկական ուռուցքաբանության միջազգային միության ասիական մայրցամաքային մասնաճյուղը հիմնել է իր սեփական միությունը, որը կոչվում է SIOP Asia կամ Asian Society of Pediatric Oncology (Մանկական ուռուցքաբանության ասիական միություն): SIOP Asia-ն նպատակ ունի նպաստելու քաղցկեղով հիվանդ երեխաների և երիտասարդների բարձրորակ խնամքի կազմակերպմանը։ Այս միությունը նվիրված է մանկական քաղցկեղի մասին իրազեկվածության բարձրացմանը, ախտորոշման և բուժման բարելավմանը:
Մանկական ուռուցքաբանության միջազգային միության մասին (SIOP)
Մանկական ուռուցքաբանության միջազգային միությունը (Société Internationale d’Oncologie Pédiatrique/International Society of Pediatric Oncology, SIOP) աշխարհում միակ միությունն է` կազմված մանկական արյունաբանության/ուռուցքաբանության շուրջ 2600 մասնագետներից։ Այն կազմավորվել է 1969 թվականի նոյեմբերի 6-ին, որպես մասնագետների փոքր խումբ Գուստավ-Ռուսիի ինստիտուտում (IGR) Վիլժյուիֆ, Փարիզ, որի առաքելությունն էր զարգացնել քաղցկեղով հիվանդ երեխաների ուսումնասիրությունը և խնամքը, հիմնաքարային առաքելություն, որով առաջնորդվում են մինչ օրս։
Այսօր այս նպատակներն ընդլայնվել են՝ ընդգրկելով հիմնական հետազոտությունների, ինչպես նաև կլինիկական ուսումնասիրությունների արդիականացումը, բուժքույրերի, առողջապահական այլ մասնագետների և ծնողների ներգրավումը, ինչպես նաև ուսուցման և հանրայնացման ծրագրերի կազմակերպումը զարգացող երկրներում և հասարակություններում` ուղզված երեխաների վիճակի բարելավմանը։
SIOP-ի տեսլականն է` «ոչ մի երեխա չպետք է մահանա քաղցկեղից. բուժել շատերին, հոգ տանել բոլորի մասին»:
SIOP-ն ունի մայրցամաքային մասնաճյուղեր Եվրոպայում, Ասիայում, Օվկիանիայում, Աֆրիկայում, Լատինական Ամերիկայում և Հյուսիսային Ամերիկայում։
https://siop-congress.org/about-siop/