ԱՄՆ Առևտրի դաշնային հանձնաժողովը նախնական հետաքննություն է սկսել Coca-Cola և PepsiCo ընկերությունների նկատմամբ՝ զովացուցիչ ըմպելիքների շուկայում գների խտրական քաղաքականություն վարելու կասկածանքով։ Այս մասին հայտնել է Politico պարբերականը՝ վկայակոչելով աղբյուրներ։
Հաղորդվում է, որ ընկերությունների գնային ռազմավարությունը հետաքննվելու է Ռոբինսոն-Փաթմանի ակտ կոչվող օրենքի շրջանակներում: Այդ օրենքը մատակարարներին արգելում է ավելի լավ գին առաջարկել խոշոր մանրածախ վաճառողներին՝ ի վնաս իրենց մանր մրցակիցների: 1936 թ.-ին ընդունված օրենքը, որը հիմնականում մոռացության է մատնվել, նպատակ ունի հավասար պայմաններ ստեղծել մանր ընկերությունների և խոշոր առևտրային ցանցերի համար:
Ըստ պարբերականի աղբյուրների՝ վերջին ամսվա ընթացքում ԱՄՆ Առևտրի դաշնային հանձնաժողովը կապվել է խոշոր մանրածախ ցանցերի հետ, այդ թվում՝ Walmart-ի, որպեսզի տեղեկություններ ստանա նրանց կողմից զովացուցիչ ըմպելիքների գնման և գների սահմանման վերաբերյալ:
Պարբերականը նշում է, որ այս հետաքննությունը ցույց է տալիս, որ ԱՄՆ նախագահ Ջո Բայդենի վարչակազմը մեծ ուշադրություն է դարձնում հակամենաշնորհային քաղաքականությանը և «խոշոր ընկերություններին զսպելուն»:
«Ռոբինսոն-Փաթմանի ակտը» դաշնային հանձնաժողովի կողմից չի կիրառվել 1988 թ.-ից ի վեր:
Օրենքի քննադատները, սակայն, նշում են, որ դա կարող է հակառակ ազդեցությունն ունենալ. փոքր բիզնեսը զարգացնելուն զուգահեռ խոշոր առևտրային ցանցերում գները կբարձրանան, ինչից կտուժեն սպառողները:
ԱՄՆ Առևտրի դաշնային հանձնաժողովի խոսնակը, PepsiCo-ի, Coca-Cola-ի և Walmart-ի ներկայացուցիչներն առայժմ հրաժարվել են մեկնաբանություն տալ պարբերականին: