Էնդոկրինոլոգ Նատալյա Լիբերանսկայան թվարկել է ամենատարածված խնդիրները, որոնք կարող են առաջանալ քիչ ակտիվ ապրելակերպի պատճառով, հայտնում է «МедикФорум»-ը։
Նստակյաց կենսակերպն այսօր բնորոշ է շատերին, նույնիսկ երիտասարդ սերնդին: Գրասենյակում բազմաթիվ ժամերի աշխատանքը, խցանումների մեջ կանգնելը, տանը հեռուստացույցն ու գաջեթները՝ ավա՜ղ, ի վերջո սրանք մեզ վրա շատ թանկ են նստում։
«Այս կենսակերպի ռիսկերից մեկը քաշի ավելացումն է: Շարժումը ստիպում է մարմնի հյուսվածքներին արտադրել լիպոպրոտեինլիպազա ֆերմենտը, որը վերահսկում է արյան մեջ լիպիդների քանակը և օգնում վերամշակել սննդի հետ կլանվող ճարպերն ու շաքարները»,- ասում է փորձագետը։
Նստակյաց կենսակերպը չի նպաստում ճարպերի այրման գործընթացներին, արդյունքում փոփոխվում է քաշն ու կազմվածքը, առաջանում է մետաբոլիկ համախտանիշ։
Մեկ այլ լուրջ խնդիր է կյանքի տեևողության կրճատումը։ Մարդիկ, որոնք քիչ են շարժվում, ավելի շուտ են մահանում: ԱՀԿ-ի տվյալներով՝ 6-7 տոկոս դեպքերում մահացության պատճառը նստակյաց կենսակերպն է։
Մարդիկ, որոնք քիչ են շարժվում, ունեն շաքարախտի և սրտի հիվանդությունների զարգացման բարձր ռիսկ: Այն նաև պարարտ հող է քրոնիկ հիվանդությունների առաջացման համար։
Հաճախ քիչ շարժվող մարդիկ ոսկրային և մկանային հյուսվածքների հետ կապված խնդիրներ են ունենում: Ամենից հաճախ տուժում են մեջքը և պարանոցը: Տարիքի հետ այս խնդիրները միայն խորանում են:
Պասիվ կենսակերպը կարող է նաև դեպրեսիվ խանգարումներ և բարձր տագնապայնություն առաջացնել: Սա հատկապես վերաբերում է այն մարդկանց, որոնք օրական 8-10 ժամ նստած են անցկացնում։