Ճապոնիա պետական այցի շրջանակներում ԱՄՆ նախագահ Դոնալդ Թրամփը հրավիրված է կայսերական ընթրիքին, գոլֆի խաղին և սումոյի հանդիպմանը: Այսպիսով, վարչապետ Սինձո Աբեն կկենտրոնանա անձնական կապերի վրա, այլ ոչ թե առևտրի, անվտանգության ոլորտի արդյունքների կամ Հյուսիսային Կորեայի հարցի վրա, գրում է AP-ն:
Թրամփը և Աբեն գոլֆ կխաղան պրոֆեսիոնալ գոլֆիստ Իսաո Աոկիի մասնակցությամբ: Այնուհետ երկու առաջնորդներն իրենց կանանց հետ ընթրիքից առաջ կդիտեն սումոյի հանդիպումը:
Թրամփ զույգը հրավիրված է նաև կայսերական պալատում ֆրանսիական ընթրիքին, որը կազմակերպվել է կայսր Նարուխիտոյի և նրա կնոջ կողմից:
Թրամփը կլինի առաջին օտարերկրյա առաջնորդը, որը կդառնա Նարուխիտոյի հյուրն այն բանից հետո, երբ մայիսի սկզբին նա ժառանգել էր գահը:
Թրամփը և Աբեն գագաթնաժողովում պետք է քննարկեն առևտրի, Հյուսիսային Կորեայի, անվտանգության և հնարավոր է նաև տիեզերական համագործակցությունը, սակայն ոչ մի նշանակալի արդյունք չի ակնկալվում:
«Հիմնական թեման երկու երկրների ղեկավարների միջև սերտ անձնական կապերի հաստատումն է` ցույց տալու համար ԱՄՆ-ի և Ճապոնիայի միջև հարաբերությունների կարևորությունը և ոչ միայն երկու երկրների ազգային շահերի համար, այլև ողջ տարածաշրջանի համար», – ասել է Ռազմավարական և միջազգային հետազոտությունների կենտրոնի փորձագետ Նիկոլաս Սեչենին:
«Այս այցը վկայում է այն մասին, որ ԱՄՆ-ն պահպանելու է Ասիայում դաշնակիցների նկատմամբ հավատարմությունը և հետաքրքրությունն Ասիայի հանդեպ»:
![](https://azat.tv/wp-content/uploads/2022/09/azattvlogoblack.png)