Ինտերպոլի համակարգմամբ անցկացված «CyberProtect III» միջազգային գործողության ընթացքում բացահայտվել են մարդկանց թրաֆիքինգի 27 հավանական զոհեր և կասկածյալների 18 պրոֆիլներ, որոնք գործել են բաժանորդագրային հարթակներում: Գործողությունը տեղի է ունեցել մայիսի 19-22-ը Լիոնում՝ Ինտերպոլի կենտրոնակայանում, որին մասնակցել են յոթ երկրների, այդ թվում՝ Մեծ Բրիտանիայի, Գերմանիայի և Ուկրաինայի իրավապահ մարմինների 14 ներկայացուցիչներ:
Ինտերպոլի տվյալներով՝ կազմակերպված հանցավոր խմբերը որդեգրել են նոր մոդել. նրանք ներկայանում են որպես մոդելային գործակալություններ՝ հավաքագրելով կանանց, անչափահասներին և խոցելի այլ անձանց: Հավաքագրումից հետո հանցագործները վերահսկողություն են սահմանում զոհերի հաշիվների նկատմամբ՝ յուրացնելով եկամուտների մեծ մասը և հոգեբանական ճնշումների միջոցով ստիպելով ստեղծել բացահայտ էրոտիկ բնույթի նյութեր: Այս մեթոդաբանության մասին Ինտերպոլը դեռ փետրվարին զգուշացրել էր «Purple Notice»-ի միջոցով:
Հետաքննության ընթացքում բացահայտվել են նաև այլ հանցավոր գործելաոճեր, այդ թվում՝ արհեստական բանականության միջոցով ստեղծված կեղծ պրոֆիլների օգտագործումը, կրիպտոարժույթով վճարումները և այսպես կոչված «էլեկտրոնային պոռնոգրության» (e-pimping) խթանումը, երբ տղամարդկանց սովորեցնում են շահույթ ստանալ կանանց շահագործումից: Հատկանշական է, որ հայտարարությունների մեծ մասում գերակշռել են Հարավային Ամերիկայից մոդելները, ինչը վկայում է տարածաշրջանում վիրտուալ շահագործման մասշտաբների մասին:
Ինտերպոլի Կազմակերպված և նոր ի հայտ եկող հանցավորության գծով տնօրեն Դեյվիդ Քաունթերը նշել է, որ հաքաթոնի ձևաչափը թույլ է տվել արագորեն բացահայտել հանցավոր ցանցերը: Գործողությանը աջակցել են Meta-ն, TikTok-ը, Europol-ը, ինչպես նաև թրաֆիքինգի դեմ պայքարող մի շարք հասարակական կազմակերպություններ: