Իրանի նախագահ Հասան Ռոուհանին լավ նորություն է համարել Սիրիայից զորքերը դուրս բերելու ԱՄՆ-ի մտադրությունը, բայց հայտարարել է, որ դժվար է հավատալ Վաշինգտոնի խոստումներին։ Ինչպես հաղորդվում է՝ այդ մասին, ասված է նրա պաշտոնական կայքում հրապարակված հաղորդագրության մեջ։
«Վերջերս նրանք հայտարարեցին, թե ցանկանում են իրենց ուժերը դուրս բերել Սիրիայից, եթե ճիշտ են ասում, ապա դա լավ նորություն է»,-ասել է Ռոուհանին Սոչի մեկնելուց առաջ, որտեղ մասնակցելու է Սիրիային նվիրված Ռուսաստան-Թուրքիա-Իրան եռակողմ գագաթնաժողովին, որը տեղի է ունենալու այսօր: Իրանի նախագահը հավելել է. «Մենք երբեք չենք կարող վստահել ամերիկացիների խոսքերին ու խոստումներին»: Նա նաև նշել է, որ Իրանը կարեւորում է Սիրիայի տարածքային ամբողջականության պահպանումը, ինչի կապակցությամբ հայտարարել է, որ Սիրիայի ամբողջ տարածքը պետք է վերահսկվի Դամասկոսի կողմից:
Միևնույն ժամանակ Ռոուհանին նշել է, որ Սիրիայի ապագան իրենց իսկ սիրիացիների ձեռքում է, հաղորդում է «ՌԻԱ Նովոստին»: