Իռլանդիայում ոստիկանությունը՝ Զինված ուժերի աջակցությամբ, ցրել է Whitegate նավթավերամշակման գործարանի մուտքը փակած ցուցարարներին: Հինգ օր շարունակվող շրջափակումը երկրում վառելիքի սուր պակասուրդ էր առաջացրել, ինչի հետևանքով հարյուրավոր լցակայաններ դատարկվել են: Իշխանությունները հայտարարել են «բացառիկ իրավիճակի» մասին՝ թույլ տալով ոստիկանությանը կրկնապատկել աշխատակիցների թիվը՝ կարգուկանոնը վերականգնելու համար:
Իռլանդիայի վարչապետ Միխոլ Մարտինը նախազգուշացրել է, որ երկիրը գտնվում է էներգետիկ ճգնաժամի եզրին, քանի որ Հորմուզի նեղուցի փակումը համաշխարհային շուկայում նավթի գների կտրուկ աճի պատճառ է դարձել: Իռլանդիայում դիզվառելիքի գինը հասել է 2.17 եվրոյի՝ մեկ լիտրի դիմաց: Կառավարությունը բանակցություններ է վարում տրանսպորտային և գյուղատնտեսական ոլորտների ներկայացուցիչների հետ՝ փորձելով մշակել աջակցության փաթեթ, սակայն ցուցարարները շարունակում են պահանջել գների իջեցում և հրաժարվում են ազատել ռազմավարական նշանակության ճանապարհները:
Իրավիճակը լուրջ մտահոգություն է առաջացրել հասարակական ծառայությունների աշխատանքի վերաբերյալ: Բուժքույրերը և սոցիալական աշխատողները չեն կարողանում հասնել իրենց հաճախորդներին, իսկ հանրային տրանսպորտը կաթվածահար է եղել: Արդարադատության նախարար Ջիմ Օ’Քալագանը հայտարարել է, որ ցուցարարներին սպառնում են իրավական հետևանքներ, այդ թվում՝ վարորդական իրավունքից զրկում, եթե շրջափակումները չդադարեցվեն: Չնայած կառավարության հետ բանակցություններին՝ բողոքի ակցիաները շարունակվում են երկրի տարբեր շրջաններում: