Իսրայելական ուժերը հարված են հասցրել Լիբանանի մայրաքաղաք Բեյրութին, կա առնվազն մեկ զոհ, մոտ մեկ տասնյակ վիրավոր։
Իսրայելի պաշտպանության բանակը հայտարարել է, որ թիրախային հարված է հասցրել «Հեզբոլա»-ի հրամանատարին, որին պատասխանատու է համարում Գոլանի բարձունքներում անցած հանգստյան օրերին 12 երեխաների և դեռահասների կորստի պատճառ դարձած հարվածի համար։
Իսրայելը Լիբանանի հարավային շրջանները վերահսկող իրանամետ «Հեզբոլա»-ին էր մեղադրել օկուպացված Գոլանի բարձունքներում ֆուտբոլի դաշտի վրա հրթիռային հարվածի համար։ Շարժումը պատասխանատվություն չէր ստանձնել։
Լիբանանի պետական ազգային լրատվական գործակալությունը հայտնել է, որ իսրայելական հարվածը թիրախավորել է մայրաքաղաքի Հարեթ Հրեյք թաղամասում գտնվող «Հեզբոլա»-ի Շուրայի խորհրդի շրջակայքը:
Ռազմական խմբավորման օպերատիվ կենտրոնի ղեկավար Մուհսին Շուքրը փրկվել է, Reuters-ին ավելի ուշ հայտնել են նրա անվտանգության երկու բարձրաստիճան աղբյուրները: