Հայտնի ջազ վոկալիստ Ջեյմի Դեվիսը երևանյան համերգի ընթացքում ելույթ կունենա Հայաստանի պետական ջազ նվագախմբի նվագակցությամբ՝ գեղարվեստական ղեկավար և դիրիժոր Արմեն Հյուսնունցի ղեկավարությամբ:
Համերգային երեկոն տեղի կունենա ապրիլի 5-ին Հայաստանի ճարտարապետների միության դահլիճում:
Ջեյմի Դեվիսը ծնվել է 1949 թվականին: 13 տարեկանում ստեղծել է իր սեփական ջազ բենդը: 1975 թվականին տեղափոխվել է Սան Ֆրանցիսկո, որտեղ աշխատել է ամերիկյան աստղերի հետ: 2000-ին ելույթ է ունեցել The Count Basie Orchestra-ի հետ՝ արժանանալով լայն հանդիսատեսի ճանաչմանը:
Իր կարիերայի ընթացքում Ջեյմին մշտապես հետևել է իր սիրելի ջազմենների՝ Ռեյ Չարլզի, Օտիս Ռեդինգի, Էլ Գրինի և այլոց օրինակին:
Ջեյմի Դեվիսի երգացանկում ներառված են լավագույն ջազային ստանդարտները և էստրադային հիթերի նվագախմբային մշակումները: Նորարարության և դասականի միաձուլում, բլյուզի և սոուլի ելևէջներ, ջերմ, հզոր և զգացմունքային բարիտոն.ահա թե ինչու է այս ամերիկացի արտիստը մեծ պահանջարկ վայելում ոչ միայն ԱՄՆ-ում, այլև երկրի սահմաններից դուրս:
