ԱՄՆ նախագահի անվտանգության հարցերով խորհրդական Ջոն Բոլթոնն իր թվիթերյան էջում գրառում է կատարել Նիկոլ Փաշինյանի հետ ունեցած հեռախոսազրույցի մասին: Նա նաև ողջունել է Հայաստանում անցկացված ընտրությունները:
«Երեկ ես զանգահարեցի Հայաստանի վարչապետ Փաշինյանին՝ շնորհավորելու նրան վերընտրվելու կապակցությամբ և ողջունելու հայ ժողովրդին դեկտեմբերին ազատ և արդար ընտրություններ անցկացնելու կապակցությամբ: ԱՄՆ-ն աջակցում է Հայաստանի համար բարգավաճ ապագա ապահովելու նրա ջանքերին»,- մասնավորապես ասել է Բոլթոնը:
Ավելի վաղ հայտնել էինք, որ Հայաստանի վարչապետը այսօր հեռախոսազրույց է ունեցել ԱՄՆ նախագահի՝ ազգային անվտանգության հարցերով խորհրդական Ջոն Բոլթոնի հետ ու քննարկել երկկողմ հարաբերությունները։ Ֆեյսբուքյան գրառումով այս մասին տեղեկացնելիս Նիկոլ Փաշինյանը հատուկ ընդգծել էր, որ Արցախի հարցը չի քննարկվել։
