Արցախի մարդու իրավունքների պաշտպան Գեղամ Ստեփանյանը Ադրբեջանի վերջին սադրիչ գործողությունների, Արցախը շրջափակելու առնչությամբ Ամերիկայի Միացյալ Նահանգներից՝ որպես ժողովրդավարության, մարդու իրավունքների պաշտպանության օրակարգ առաջ մղող երկիր, ակնկալում է կոնկրետ գործողություններ: Ստեփանյանը նման տեսակետ հայտնեց ԱՄՆ դեսպանատան դիմաց իրականացված բողոքի ակցիայի ժամանակ:
Արցախի ՄԻՊ-ն ընդգծեց, որ արդեն չորրորդ օրն է՝ Ադրբեջանը փակել է Արցախի կյանքի ճանապարհը և թույլ չի տալիս, որպեսզի կենսական կարևորության սննդամթերքի, իրերի և մարդկանց փոխադրումներ իրականացնել, ինչպես նաև երկու օր առաջ դադարեցվել է գազամատակարարումը:
Նա Ադրբեջանի այս քայլը որակեց որպես հանցավոր գործողություն և նշեց, որ իրենք արդեն երկու տարի է՝ բարձրաձայնում և դիմում են միջազգային հանրությանը, այդ թվում՝ Միացյալ Նահանգներին՝ ասելով, որ Ադրբեջանը Արցախում իրականացնում է էթնիկ զտման քաղաքականություն:
«Մենք հայտարարում ենք, որ Ադրբեջանը իրականացնում է ցեղասպանական քաղաքականություն և մենք տեսնում ենք, որ այս ամենից հետո միջազգային հանրությունը փորձում է հավատալ Ադրբեջանի այսպես կոչված խոստումներին, թե իբր կարող է ապահովել Արցախում ապրող հայերի իրավունքներն ու անվտանգությունը: Դա միանշանակ կեղծիք է, և այն, ինչ այսօր անում է Ադրբեջանը, այդ կեղծիքի իրական դրսևորումն է»,- ասաց Գեղամ Ստեփանյանը:
Նրա խոսքով ՝ այսօր հավաքվել են ևս մեկ անգամ դիմելու ԱՄՆ-ին և պահանջելու տեր կանգնել մարդու իրավունքների համընդհանրության կարևորության սկզբունքին:
«Ինչպես կարող ենք պատկերացնել, որ Մարդու իրավունքների պաշտպանը չկարողանա հասնել իր ժողովրդին՝ նրա իրավունքները պաշտպանելու համար: Այս պահին ես այդ կարգավիճակում եմ, և չեմ կարողանում իրացնել իմ մանդատը, որը ինձ տրված է հենց այդ ժողովրդի կողմից: Սա դատապարտելի երևույթ է, որը պետք է արժանանա միջազգային հանրության հստակ արձագանքին և Ադրբեջանի անպատժելիությունը չպետք է շարունակվի, ի վերջո հանցագործը պետք է ենթարկվի պատժամիջոցների»,- նշեց Արցախի ՄԻՊ-ը:
Նա ընդգծեց՝ եթե Ամերիկայի Միացյալ Նահանգներն ունի այդ պարտավորությունը նաև որպես ԵԱԿՀ Մինսկի խմբի համանախագահող և ՄԱԿ-ի անվտանգության խորհրդի մշտական անդամ, պետք է իրական ռեալ քայլեր ձեռնարկի և վերջ դնի այդ անպատժելիությանը:
Բողոքի ակցիայի շրջանակում մասնակիցներին բաժանվել են սպիտակ թղթեր, որոնցով իրենք պատրաստեցին ինքնաթիռներ և, ի նշան բողոքի, նետեցին դեսպանատան տարածք:
Ըստ Արցախի Հանրապետության պետական նախարարի խորհրդական Արտակ Բեգլարյանի՝ ակցիայի նպատակն էր, որպեսզի միջազգային հանրությունը օդային հումանիտար միջանցք բացի Արցախի համար, որն այսօր կենսական հարց է:
«Բացի ցամաքային միջանցքից, մենք պետք է ունենանք նաև օդային միջանցք, և սա միջազգային հանրության պարտավորությունն է»,- ընդգծեց Բեգլարյանը: