ՀՀ ԱԺ «Բաց դռներ» ծրագրի շրջանակում ապրիլի 17-ին խորհրդարան են այցելել Հյուսիսային համալսարանի իրավագիտության ֆակուլտետի ուսանողները: Նրանց ուղեկցել են համալսարանի հիմնադիր ռեկտոր Բորիս Մակիչյանը, բուհի գիտական հետազոտությունների կենտրոնի ղեկավար, փիլիսոփայական գիտությունների դոկտոր Գրիգոր Ասատրյանը, դասախոսներ:
Հյուրերը շրջել են խորհրդարանի շենքում, հետևել ԱԺ հերթական նիստի աշխատանքին: Նրանց հետ հանդիպել և բաց դաս է անցկացրել ՀՀ ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի պատգամավոր Սոֆիա Հովսեփյանը:
Պատգամավորը ներկայացրել է խորհրդարանի կառուցվածքը, մշտական հանձնաժողովների գործունեությունը, օրենսդրական նախաձեռնությունների քննարկման ընթացակարգը:
Սոֆիա Հովսեփյանը պատասխանել է ուսանողներին հետաքրքրող հարցերին, որոնք հիմնականում վերաբերել են բուհական, հետբուհական կրթությանը, բուհական մրցակցությանը, օրենսդրական անհրաժեշտ փոփոխություններին:
Պատգամավորի համոզմամբ՝ առկա խնդիրները կլուծվեն ժամանակի ընթացքում` նաև օրենսդրական ճանապարհով:
«Հյուսիսային» համալսարանի ռեկտորը Սոֆիա Հովսեփյանին հրավիրել է դասախոսելու բուհում: Բորիս Մակիչյանը պատգամավորին նվիրել է իր հեղինակած «Բարձրագույն կրթության հիմնախնդիրները» խորագիրը կրող ժողովածուն, որում ամփոփված են հեղինակի՝ կրթության ոլորտի հիմնախնդիրներին, բնագավառի բարեփոխմանը միտված գործընթացներին վերաբերող դիտարկումներն ու առաջարկները:
Բաց դասի մասնակիցները լուսանկարվել են ԱԺ նիստերի դահլիճում, ապա այցելել ԱԺ թանգարան:
ԽՈՐՀՈւՐԴ Է ՏՐՎՈւՄ ԿԱՐԴԱԼ
