«Լենստեր»-ի և Իռլանդիայի մինչև 20 տարեկանների ռեգբիի հավաքականի խաղացող Ալան Սփայսերը խուսափել է քրեական դատվածությունից՝ մարմնական վնասվածք հասցնելու մեղադրանքով։ Դուբլինի շրջանային դատարանը հունիսի 10-ին հրապարակված որոշմամբ կիրառել է «Իրավախախտների փորձաշրջանի մասին» օրենքը (Probation of Offenders Act)՝ հաշվի առնելով մարզիկի անկեղծ զղջումը և նախկինում դատվածություն չունենալու հանգամանքը։
Ինչպես հաղորդում է Irish Examiner-ը, միջադեպը տեղի է ունեցել մարտի 1-ին Դուբլինի Copper Face Jacks գիշերային ակումբում։ 21-ամյա ռեգբիստը խոստովանել է, որ ալկոհոլի ազդեցության տակ վիճաբանության ժամանակ պլաստիկ բաժակ է նետել 20-ն անց մի կնոջ ուղղությամբ, ինչի հետևանքով վերջինս ստացել է շրթունքի վնասվածք և ատամնաբուժական խնդիրներ։
Դատավոր Թրիսա Քելլին ընդգծել է, որ Սփայսերը ձերբակալման պահից ցուցաբերել է համագործակցային վերաբերմունք և անհապաղ փոխհատուցել է տուժողին՝ վճարելով 10,000 եվրո։ Դատարանը հաշվի է առել նաև պաշտպանության կողմի ներկայացրած բնութագրերը, այդ թվում՝ Իռլանդիայի ռեգբիի միության (IRFU) և ակումբի կողմից տրված երաշխավորագրերը։ Այս որոշումը թույլ է տալիս մարզիկին շարունակել կարիերան՝ առանց դատվածության հետ կապված ճանապարհորդական սահմանափակումների։