Մահացու հարձակում Ամրիտսարում և հետաքննության ընթացքը
Փանջաբի հայտնի ԼԳԲՏՔ ինֆլուենսեր և դիմահարդար Մադհուսուդանը՝ հայտնի որպես Մադ Սանդհու, շաբաթ երեկոյան՝ հոկտեմբերի 3-ին, հրազենային վիրավորում է ստացել Ամրիտսարի Լոհարկա ճանապարհին և մահացել հիվանդանոց տեղափոխվելիս, հաղորդում է The Tribune-ը: Հարձակումն իրականացրել են երկու անհայտ անձինք մոտոցիկլետով, որոնք կրակել են Սանդհուի ուղղությամբ և դիմել փախուստի, ինչպես նշում է Hindustan Times-ը: Ականատեսների վկայությամբ՝ մոտ երկու-երեք կրակոց է արձակվել, իսկ հարձակումը տեղի է ունեցել այն պահին, երբ նա մոտեցել է խանութին՝ իր մեքենան վերցնելու համար, որը հանձնլ էր լվացման։
Ոստիկանության լրացուցիչ փոխոստիկանապետ Սիրիվենելան հայտնել է, որ իրավապահները դեպքի վայրում սկսել են հետաքննություն, ուսումնասիրում են տեսահսկման տեսախցիկների ձեռք բերված տեսագրությունները, իսկ ոստիկանությունը հայտարարել է, որ ունի որոշակի հետքեր ու աշխատում է մի քանի վարկածի ուղղությամբ, չնայած հարձակման դրդապատճառն ու հարձակվողների ինքնությունը դեռևս հաստատված չեն: Միևնույն ժամանակ, ըստ NDTV-ի, ոստիկանությունն ստուգում է սոցցանցերում «Գոլդի Դհիլոն» օգտանունով հրապարակված գրառումը, որում հայտարարվել է հարձակման պատասխանատվության մասին: Ամրիտսարի ոստիկանության հանձնակատար Հարմանբիր Սինգհ Գիլի խոսքով՝ Սանդհուն Փանջաբի ոստիկանության թոշակի անցած ենթասպայի որդի էր և բնակվում էր Ամրիտսարի գյուղական ոստիկանության ենթակայության տակ գտնվող բնակելի թաղամասում:
Գործունեությունը և հասարակական ճնշումը
Մոտ 30-ամյա Մադ Սանդհուն Ինստագրամում ուներ ավելի քան 200,000 հետևորդ, որոնց հետ կիսվում էր նորաձևության, գեղեցկության, ինչպես նաև սոցիալական նորմերի և ԼԳԲՏՔ իրավունքների մասին տեսանյութերով: Նա մասնագիտական կարիերան սկսել էր որպես ոճաբան և զգեստների ձևավորողի օգնական՝ աշխատելով Փանջաբում և Մումբայում, իսկ հետո անցել էր դիմահարդարման և թվային բովանդակության ստեղծման: Նա նաև դերասանական փոքր դերեր է ունեցել Փանջաբի զվարճալի նախագծերում, այդ թվում՝ «Oye Bhole Oye» սերիալում, և Ամրիտսարում գեղեցկության սրահ է ունեցել:
Լինելով բացահայտ գայ և ԼԳԲՏՔ տեսանելի անձ պահպանողական ու հիպերմասկուլինային հասարակությունում՝ Սանդհուն պարբերաբար բախվել է հոմոֆոբիկ տրոլինգի, սպառնալիքների և հասարակական բնույթի քննադատության: 2021 թվականի «Josh Talks»-ին տված իր հարցազրույցում նա պատմել էր պահպանողական միջավայրում մեծանալու դժվարությունների մասին՝ նշելով, որ անտեսում է բացասական մեկնաբանությունները, քանի որ գիտի, թե ինչպես ապրել իր կյանքով:
Հետաքննությունը, նախորդ միջադեպերը և քաղաքական արձագանքը
Այս սպանությունը կրկին ուշադրություն է հրավիրել տարածաշրջանում բլոգերների և հասարակական գործիչների անվտանգության հիմնախնդրի վրա: Հուլիս ամսին Սանդհուն հրապարակավ բախվել էր մի նիհանգ ջաթեդարի հետ, ով առարկել էր նրա տեսանյութերի, հագուստի և հին գրառումների դեմ՝ պնդելով, թե դրանք բացասաբար են ազդում երիտասարդների վրա: Իրավապահ մարմինները նշում են, որ ստուգում են այդ նախորդ միջադեպը որպես հնարավոր հանգամանք, սակայն ուղղակի կապը դեռևս հաստատված չէ, և հետաքննությունը շարունակում է ուսումնասիրել բոլոր վարկածները:
Միջադեպը նաև քաղաքական արձագանք է առաջացրել Փանջաբում: Կոնգրեսի առաջնորդ Ռաջ Կումար Վերկան քննադատել է AAP-ի կառավարությանը օրենքի և կարգի պահպանման ձախողման համար՝ պահանջելով գլխավոր նախարար Բհագվանտ Մանի հրաժարականը, իսկ Ամրիտսարի պատգամավոր Գուրջիթ Սինգհ Աուջլան պահանջել է անհապաղ ձերբակալել մեղավորներին՝ նշելով, որ Սանդհուն նախկինում ևս սպառնալիքներ էր ստացել և բացահայտ բարձրաձայնել դրանց մասին սոցցանցերում:
Այս սպանությունը հիշեցնում է նաև 2025 թվականի հունիսին Բատինդայում և Լուդհիանայում տեղի ունեցած նմանատիպ միջադեպերը, երբ ինֆլուենսեր Կանչան Կումարին՝ հայտնի որպես Կամալ Կաուր Բհաբի, սպանվել էր արմատական սիքհ վիգիլանտների կողմից՝ վերջիններիս կողմից նրա բովանդակությունը «բարոյազուրկ» որակելուց հետո: Այժմ Ամրիտսարի ոստիկանությունը շարունակում է ակտիվ որոնողական աշխատանքները՝ պարզելու հանցագործության բոլոր դրդապատճառներն ու պատասխանատուներին: