ԲԱՐՍԵԼՈՆԱ (Ազատ TV) – ՖԿ «Բարսելոնայի» գլխավոր տնօրեն Մանել դել Ռիոն ամսվա վերջին կլքի ակումբը: Այս մասին հայտնում է Ara օրաթերթը, որի տեղեկությունը հաստատել է Mundo Deportivo-ն։
Դել Ռիոն իր որոշման մասին արդեն տեղեկացրել է նախագահ Ժոան Լապորտային և երկուշաբթի օրը հրաժեշտ է տվել Ղեկավար կոմիտեին։ «Բարսելոնայի» աղբյուրների համաձայն՝ հեռացումը տեղի է ունեցել փոխադարձ համաձայնությամբ, և ակումբում բարձր են գնահատել նրա հինգ տարվա աշխատանքը, որից վերջին տարին նա զբաղեցնում էր գլխավոր տնօրենի, իսկ նախկինում՝ ֆինանսական տնօրենի պաշտոնը։
Ակումբից նշել են, որ գլխավոր տնօրենի պաշտոնն առայժմ թափուր կմնա, իսկ Սերխիո Սերանոն, ով նախկինում աշխատել է Banc de Sabadell-ում, կստանձնի նոր ֆինանսական ղեկավարությունը՝ փոխարինելով Մարսել Ռամիրեսին։ Դել Ռիոյի հեռացումը համընկնում է այն ժամանակահատվածի հետ, երբ ակումբը հայտարարել է ԼաԼիգայի ֆինանսական «ֆեյր փլեյի» պահպանման մասին, թեև առջևում մնում է 300 միլիոն եվրոյի նոր վարկի ներգրավման անհրաժեշտությունը՝ «Espai Barça» նախագծի աշխատանքներն ավարտելու համար։