Առողջապահություն

ՄԻԱՎ-ի վերաբերյալ հետազոտություն անցնելը կարևոր է առողջությունը պահպանելու և վարակի փոխանցումը կանխելու տեսանկյունից

Յուրաքանչյուր տարվա մայիսի երրորդ կիրակին նշվում է որպես ՁԻԱՀ-ից մահացածների հիշատակի միջազգային օր: Այս տարի այն նշվել է մայիսի 19-ին:

ՁԻԱՀ-ը շարունակում է մնալ մարդկության զարգացմանը խոչընդոտող մարտահրավեր, իսկ ՄԻԱՎ վարակի համաճարակը ստացել է համավարակի բնույթ, որից չի խուսափել աշխարհի և ոչ մի երկիր: ՄԻԱՎ/ՁԻԱՀ-ի խնդիրն արդիական է նաև մեր հանրապետության համար: 2019թ. ապրիլի 30-ի դրությամբ Հայաստանում գրանցվել է ՄԻԱՎ վարակի 3472 դեպք ՀՀ քաղաքացիների շրջանում:

Հիվանդության զարգացման առանձնահատկություններով պայմանավորված ողջ աշխարհում ՄԻԱՎ-ով ապրող մարդկանց մի զգալի մասը չգիտի իր օրգանիզմում ՄԻԱՎ-ի առկայության մասին: Հայաստանում այդ մասին չգիտի ՄԻԱՎ-ով ապրող մարդկանցից չորսից մեկը: ՄԻԱՎ-ով վարակված մարդը երկար տարիներ (միջինը 8-10 տարի) կարող է առողջության հետ կապված որևէ խնդիր չունենալ և չիմանալ իր վարակված լինելու մասին: Արտաքինից ևս հնարավոր չէ կռահել մարդու վարակված լինելու մասին: Սա է պատճառը, որ հիվանդությունն ախտորոշվում է հիմնականում ուշ փուլերում, երբ ի հայտ են գալիս որոշակի ախտանշաններ, և նվազում է բուժման արդյունավետությունը: Վարակման պահից ի վեր մարդը կարող է ՄԻԱՎ-ը փոխանցել ուրիշներին, այդ թվում դեռ չծնված երեխային:

ՄԻԱՎ-ի վերաբերյալ հետազոտությունը հնարավորություն է տալիս ախտորոշելու հիվանդությունը վաղ շրջանում, նախքան ախտանշանների ի հայտ գալը: Վաղ ախտորոշման, ժամանակին սկսված հակառետրովիրուսային բուժման դեպքում հնարավոր է արդյունավետորեն կառավարել հիվանդության զարգացումը: Հիվանդության վաղ ախտորոշումը նաև նպաստում է ՄԻԱՎ վարակի հետագա տարածման կանխմանը, մորից երեխային ՄԻԱՎ-ի փոխանցման կանխարգելմանը:

Կարևորելով ՄԻԱՎ վարակի կանխարգելման հարցում հետազոտությունները` ՀՀ ԱՆ ՁԻԱՀ-ի կանխարգելման հանրապետական կենտրոնը պարբերաբար կազմակերպում և անցկացնում է հանրային միջոցառումներ: Դրանք միտված են ՄԻԱՎ-ի վերաբերյալ հետազոտվելու շարժառիթի ձևավորմանը և ցանկության խրախուսմանը, ՄԻԱՎ-ի վերաբերյալ հետազոտության մասսայականացմանն ու հետազոտման հետ կապված կարծրատիպերի փոփոխմանը` ամրապնդելով դիրքորոշում, որ ՄԻԱՎ-ի վերաբերյալ հետազոտություն անցնելը կարևոր է սեփական առողջությունը պահպանելու և վարակի փոխանցումը կանխելու տեսանկյունից:

Հյուսիսային պողոտայում մայիսի 19-ին կազմակերպված միջոցառումը ևս նպատակ ուներ հասարակության լայն շերտերին իրազեկել ՄԻԱՎ-ի վերաբերյալ հետազոտության կարևորության մասին` խրախուսելով անցնել ՄԻԱՎ-ի վերաբերյալ հետազոտություն: Միջոցառման ընթացքում անցորդներին հնարավորություն է տրվել անվճար, անանուն հետազոտվելու և ընդամենը 15-20 րոպեի ընթացքում ստանալու հետազոտության պատասխանը: Հետազոտվել ցանկացողներին տրամադրվել է նաև խորհրդատվություն:

Անցորդներին բաժանվել են տեղեկատվական-կրթական նյութեր: Կայացել է մոմավառություն:

Ընդհանուր առմամբ, միջոցառման ընթացքում ՄԻԱՎ-ի վերաբերյալ հետազոտվել և իր կարգավիճակի մասին իմացել է 140 քաղաքացի:

ԱՄԵՆԱԴԻՏՎԱԾՆԵՐԸ

ՎԵՐ